महेश रिजाल, भालुबाङ (दाङ) ।
दाङ जिल्लाको राप्ती गाउँपालिकामा १५ वर्षीया किसोरी बलात्कृत भएकी छिन् । बलात्कारको आरोप १६ वर्षीय किसोरमाथि लागेको छ ।
भालुबाङस्थित इलाका प्रहरी कार्यालयका अनुसार २०८२ असार १२ गते भएको सो घटनाको प्रहरी रिपोर्ट असार १५ गते दर्ता भएको हो ।
पीडित किसोरी ५६ भालुबाङ ६६ क र आरोपित किसोर ५६ भालुबाङ ६६ ए परिवर्तित नाम राखी अभियोग दर्ता गरिएको इप्रकाले जानकारी दिएको छ ।
प्रहरीका अनुसार आरोपित किसोरले गढवामा लागेको रात्रिकालीन मेला हेर्न जाने बहानामा पीडितलाई मोटरसाइकिलमा बसालेर असार १२ गते मध्यरातमा जबजस्ती गरेका थिए ।
उक्त घटना राप्ती गाउँपालिका–६ भगवानपुर सुन्दरपुरस्थित राप्ती ड्याममा घटेको पीडितले बयानमा उल्लेख गरेको प्रहरीले जनाएको छ ।
पीडित किसोरीकी बुबा रोल्पाबाट असार १४ गते दाङ आइपुगेपछि मात्रै ज्यादतीबारेको अभियोग प्रहरीमा दर्ता गराएको पीडित परिवारको दाबी रहेको छ ।
इप्रकाले जिल्ला सरकारी वकिल कार्यालय दाङबाट पाँच दिनको म्याद थप गरी आरोपित युवकसित बयान लिइरहेको छ ।
यता, सो घटनामा अन्यको पनि संलग्नता रहेको हुन सक्ने आशङ्का प्रहरीले गरेको बताइएको छ ।
