लक्ष्मी चौधरी, काठमाडौं ।
२०७७ जेठ २४ गते शनिबार । विश्वव्यापी रुपमा फैलिएको कोरोना भाइरसको संक्रमणका कारण देशभर लकडाउन गरिएको आज ७५ दिन पुगेको छ । लामो समयको लकडाउनका कारण काठमाडौं उपत्यका स्वच्छ बनेको छ । सधैँ ट्राफिक जाम, धुलाम्य र भिडभाड हुने काठमाडौं साढे दुई महिनादेखि सुनसान छ ।
यो अवधिमा काठमाडौंको मुख्य शहरी क्षेत्रमा सडक कालोपत्रे र रंगरोगन गरिएको छ भने खाल्डाखुल्डी पुरिएका छन् । शहरमा हरियाली छाएको छ । ठाउँ ठाउँमा ढकमक्क फूलहरु फूलेका छन् । धुलोमैलो हराएर काठमाडौं स्वच्छ र सफा भएको छ । लगातार तीन दिनदेखिको झरी विदो भएर घाम लाग्दा शनिबार काठमाडौंको आकाश थप सफा देखिएको छ ।
दिउँसो काठमाडौंका विभिन्न क्षेत्रमा जाँदा अरु दिनको तुलनामा सवारी साधन धेरै गुडेका थिए भने फाट्ट फूट्ट पसलहरु खुलेका थिए । कतिपय ठाउँमा मानिसहरु बाँदर, चरा र कुकुरलाई खानेकुरा खुवाइरहेको भेटियो । लकडाउनका कारण विश्वभरका मजदुरको अवस्थाको प्रतिविम्ब काठमाडौंमा पनि देखिन्छ । कतिपय ठाउँमा खान नपाएर भोको पेट मजदुरहरु सडक पेटीमा नै सुतेको देखियो ।
सरकारले घोषणा गरेको लकडाउन यही जेठ ३२ गते सकिँदैछ । सम्भवतः अबलकडाउनको स्वरुप परिवर्तन हुनेछ । बढी संक्रमित क्षेत्र बाहेक लकडाउन खुकुलो बनेर जनजीवन सामान्य हुँदै जानेछ । फेरि भिडभाड र धुँलाधुलो बढ्नेछ । के अब फेरि काठमाडौं यस्तै स्वच्छ होला ?
