काठमाडौँ । राष्ट्रिय जनमोर्चाले प्यालेस्टाइनको पक्ष लिएकाले इजरायलले इरानमाथि आक्रमण गरेको धारणा व्यक्त गरेको छ ।
अध्यक्ष तथा प्रतिनिधिसभाका सांसद चित्रबहादुर केसीको हस्ताक्षरमा २०८२ असार ४ गते बुधबार प्रेसवक्तव्य जारी गर्दै राजमोले सो धारणा व्यक्त गरेको हो ।
प्यालेस्टाइनमाथि इजरायली आक्रमणको सहउत्पादनको रूपमा इरानमाथि आक्रमण भएको बताउँदै राजमोले त्यो आक्रमणका लागि इजरायलको पक्षपोषण गर्ने अमेरिकी साम्राज्यवादको पनि विरोध गरेको छ ।
इरानसित आणविक शक्ति रहेको नाममा अमेरिकाले आफूसित रहेको आणविक शक्ति जोगाउने लक्ष्य राखेको धारणा राजमोको वक्तव्यमा उल्लेख छ ।
इजरायलमा रहेका नेपालीको सुरक्षाबारे गम्भीर हुन सरकारसित आग्रह गरिएको सो वक्तव्यको पूर्ण पाठ यस्तो छ :
“इजरायलद्वारा इरानमाथि आक्रमणको कारणले उत्पन्न युद्धको स्थितिमाथि राष्ट्रिय जनमोर्चाको गम्भीर ध्यान आकर्षित भएको छ । इजरायलद्वारा इरानमाथि गरिएको आक्रमणका सम्बन्धमा राष्ट्रिय जनमोर्चाको धारणा सार्वजनिक गर्न यो वक्तव्य जारी गरेका छौँ ।
१. इरान र इजरायलका बिचमा चलेको युद्ध प्यालेस्टाइन जनताको मुक्ति आन्दोलन र त्यसमाथि इजरायलद्वारा भइरहेको दमनद्वारा उत्पन्न स्थितिको सहउत्पादन हो । इरानले प्यालेस्टाइनको पक्षमा र इजरायलको आक्रमणकारी नीतिका विरुद्ध लगातार सम्झौताहीन र दृढ नीति अपनाउँदै आएको छ । त्यसका साथै मध्यएसियाका कैयौँ देशले वा सशस्त्र समूहले इजरायलका विरुद्ध लामो समयदेखि सङ्घर्ष गर्दै आएका छन् । त्यसैले मध्यसियाका कैयौँ देशसित इजरायलको शत्रुतापूर्ण सम्बन्ध रहँदै आएको छ ।
२. इरानले प्यालेस्टाइनको पक्षमा इजरायलको आक्रमणकारी नीतिको विरोध गरेका कारणले नै इजरायलले इरानमाथि हालै ठुलो आक्रमण गरेको छ । इरानथिको आक्रमणका पछाडि इजरायललाई अमेरिकाको समर्थन रहेको छ । त्यसैले राष्ट्रिय जनमोर्चाले इजरायलले इरानमाथि गरेको आक्रमणको कडा शब्दमा विरोध तथा भर्त्सना गर्दछ । त्यसका साथै इरानमाथि आक्रमण गर्न इजरायललाई पक्षपोषण गर्ने अमेरिकाको साम्राज्यवादी नीतिको पनि कडा शब्दमा भर्त्सना गर्दछ ।
३. मध्यएसियामा इरान आणविक हतियारको उत्पादक मुलुक मानिन्छ । त्यस क्षेत्रमा इरान आणविक शक्तिसम्पन्न राष्ट्र बन्ने दिशातर्फ अग्रसर छ । इरानको आणविक शक्तिसम्पन्न बन्ने योजनालाई ध्वस्त गर्नका लागि नै अमेरिकाको पृष्ठपोषणमा इजरायलले इरानमाथि आक्रमण गरेको कुरामा कुनै शङ्का छैन । आणविक हतियारका कारण सम्पूर्ण मानवजातिलाई नै गम्भीर खतरा भएको कुरामा पनि कुनै शङ्का छैन । त्यसैले हाम्रो दलले विश्वव्यापी रूपमा आणविक हतियार नष्ट गर्नुपर्ने कुरामा जोड दिन्छ । अमेरिकाले आफ्नो आणविक शक्तिलाई कायम राखेर अन्य मुलुकको आणविक शक्तिलाई ध्वस्त पार्न चाहन्छ । त्यो अवस्थामा एकतर्फी रूपमा इरानले आणविक हतियार बनाउन थालेको हुनाले इरानमाथि गरिएको आक्रमणलाई न्यायसँगत भन्न सकिन्न ।
४. इजरायलद्वारा इरानमाथिको आक्रमणको उद्देश्य प्यालेस्टाइनी जनतालाई उनीहरूका न्यायपूर्ण अधिकारबाट वञ्चित गर्नु र मध्यएसियामा अमेरिकी साम्राज्यवादको प्रभुत्व कायम गर्नु नै हो ।
५. इरान–इजरायलबिचको युद्धका कारण इजरायलमा ठुलो सङ्ख्यामा बसिरहेका नेपालीको सुरक्षाको प्रश्न पनि गम्भीर रूपमा अगाडि आएको छ । त्यहाँ बसोबास गरिरहेका नेपाली जनताको सुरक्षाका लागि आवश्यक ध्यान दिन हामीले नेपाल सरकारको गम्भीर ध्यान आकर्षित गर्न चाहन्छौँ ।”
