काठमाडौँ । नेकपा (मसाल) ले इरानमाथि इजरायलको आक्रमणलाई प्यालेस्टाइन युद्धको सहउपज बताएको छ ।
महामन्त्री मोहनविक्रम सिंहको हस्ताक्षरमा २०८२ असार २ गते सोमबार प्रेसवक्तव्य जारी गर्दै मसालले सो धारणा व्यक्त गरेको हो ।
वक्तव्यमा प्यालेस्टाइनी जनताको आफ्नो भूमिका वापसी र स्वतन्त्र सार्वभौम राष्ट्रको निर्माणपछि नै सो समस्याको समाधान हुने बताइएको छ ।
प्यालेस्टाइनका साथै इरानमाथि इजरायलद्वारा थोपरिएको युद्धको विरोध गर्दै पार्टीले अमेरिकी साम्राज्यवाद र इजरायली साम्राज्यवादको पनि विरोध गरेको छ ।
प्यालेस्टाइनमा मानवतामाथि आक्रमण भइरहेको बताउँदै मसालले इजरायलमा नेपालीको सुरक्षामा ध्यान दिन पनि आग्रह गरेको छ ।
यस्तो छ, प्रेसवक्तव्यको पूर्ण पाठ :
“इजरायलद्वारा इरानमाथि आक्रमणको कारणले उत्पन्न युद्धको स्थितिमाथि नेकपा (मसाल) को गम्भीर ध्यान आकर्षित भएको छ । इजरायल राज्यको स्थापना नै अमेरिकी साम्राज्यवादको समर्थनमा प्यालेस्टाइनको भूमिमाथि आक्रमण र उनीहरूलाई त्यहा“बाट जबर्जस्तीपूर्वक निष्काशनपछि गरिएको थियो । त्यसरी इजरायल राज्यको स्थापनामा नवजातिको नै अत्यन्त अमानवीय र क्रुर कारबाहीको परिणाम हो । इजरायल राज्यको स्थापनापछि प्यालेस्टाइन जनताले करिब साढे सात दशकदेखि आफ्नो मातृभूमिको मुक्तिको लागि सङ्घर्ष गर्दै आएका छन् भने इजरायलले अमेरिकी साम्राज्यवादको मदतमा उनीहरूमाथि दमन गर्दै आइरहेको छ । प्यालेस्टाइनको मुक्ति आन्दोलन मानवजातिको इतिहासको नै अत्यन्त कठिन र लामो मुक्ति आन्दोलन हो । अहिलेका इरान र इजरायलका बिचमा चलेको युद्ध पनि त्यही प्यालेस्टाइन जनताको मुक्ति आन्दोलन र त्यसमाथि इजरायलद्वारा भइरहेको दमनद्वारा उत्पन्न स्थितिको सहउपज हो । त्यो समस्याको समाधान प्यालेस्टाइनी जनताको आफ्नो भूमिमा वापसी र उनीहरूको स्वतन्त्र सार्वभौम राष्ट्रको निर्माणपछि नै हुनेछ ।
प्यालेस्टाइनको स्वतन्त्र र सार्वभौम राष्ट्र निर्माणको अर्थ अवश्य पनि इजरायलमा बसोबास गर्ने यहुदी जनतालाई राज्यविहीन बनाएर धपाउने हुनेछैन र उनीहरूको पनि एउटा स्वतन्त्र राज्य निर्माणको आवश्यकतालाई हामीले समर्थन गर्दछौँ । वास्तवमा प्यालेस्टाइनी जनता र इजरायलको बिचमा जुन शत्रुतापूर्ण सम्बन्ध कायम भएको छ, त्यसको मुख्य कारण अमेरिका र त्यसको साम्राज्यवादी नीतिलाई कार्यान्वयन गर्ने इजरायलको प्रतिक्रियावादी सरकारको भूमिका नै हो । अमेरिकी साम्राज्यवाद र इजरायलको प्रतिक्रियावादी सरकार दुबै नै प्यालेस्टाइनी र यहुदी जनतासमेतको साझा दुस्मन हुन् । ती दुबैबाट प्यालेस्टाइनी र यहुदी जनतासमेत मुक्त हुन सके मात्र उनीहरूका बिचमा शत्रुतापूर्ण सम्बन्धका लागि कुनै कारण बाँकी रहने छैन र दुबैका बिचमा मैत्रीपूर्ण सम्बन्ध कायम हुनेछ ।
अमेरिकाको इजरायल राज्यको स्थापनाका पछाडिको उद्देश्य सम्पूर्ण मध्यएसियामा आफ्नो प्रभुत्व कायम गर्नु नै मुख्य रहेको छ । अमेरिकाले एकातिर, मध्यएसियाका कैयौँ देशमा आफ्ना सैनिक अखडा कायम गरेको छ भने अर्कातिर, इजरायललाई मध्यएसियामा आफ्नो प्रभुत्व कायम गर्नका लागि किल्लाको रूपमा प्रयोग गरिरहेको छ ।
इजरायल राज्यको स्थापना प्यालेस्टाइन जनतामाथिको घोर अन्यायपूर्ण दमनमाथि कायम भएको छ । त्यसैले मध्यएसियाका कैयौँ देश मात्र होइन, संसारका पनि धेरै न्यायप्रेमी जनताको प्यालेस्टाइनी जनताको न्यायपूर्ण आन्दोलनप्रति समर्थन छ । यस सन्दर्भमा यो कुराको पनि उल्लेख नगरीकन रहन सकिँदैन कि मध्यएसियाका कैयौँ देशले वा सशस्त्र समूहले इजरायलका विरुद्ध लामो समयदेखि सङ्घर्ष गर्दै आएका छन् । प्यालेस्टाइनी जनतामाथिको इजरायलको दमनको नीतिको विरोध गर्दै आएका छन् । त्यसैले मध्यएसियाका कैयौँ देशसित इजरायलको शत्रुतापूर्ण सम्बन्ध रहेको छ । प्यालेस्टाइनी जनतामाथिको आफ्नो आक्रमणकारी नीतिलाई निरन्तरता दिन इजरायलले मध्यएसियाका कैयौँ देश वा विभिन्न सशस्त्र समूहमाथि आक्रमण गर्दै आएको छ । इरानले प्यालेस्टाइनको पक्षमा र इजराइलको आक्रमणकारी नीतिका विरुद्ध सम्झौताहीन र दृढ नीति अपनाउँदै आएको छ । त्यसैले इजरायलले इरानमाथि हालै ठुलो आक्रमण गरेको छ । हामीले इरानमाथिको इजरायलको त्यो आक्रमणको कडा शब्दमा विरोध, निन्दा र भर्त्सना गर्दछौँ । यो पनि स्पष्ट छ कि इरानमाथिको त्यो आक्रमणका पछाडि अमेरिकाको समर्थन रहेको छ । त्यसैले हामीले अमेरिकाको त्यस प्रकारको साम्राज्यवादी नीतिको पनि कडा शब्दमा भर्त्सना गर्दछौँ ।
अमेरिका वा इजरायलले इरानमाथि गरेको आक्रमणका कारणले त्यो युद्धले विस्फोटक वा विश्वयुद्धको रूप लिने सम्भावनालाई पनि अस्वीकार गर्न सकिन्न । त्यसरी त्यो युद्ध स्थानीय वा क्षेत्रीय प्रकारको युद्ध मात्र नभएर त्यसबाट सम्पूर्ण विश्वको शान्तिमा पनि खलल पुग्ने सम्भावनालाई अस्वीकार गर्न सकिन्न । अहिले इरान र इजरायलका बिचमा जुन युद्ध सुरु भएको छ, त्यसको मूल कारण प्रथम– अमेरिकी साम्राज्यवादको समर्थनमा प्यालेस्टाइनी जनतालाई उनीहरूको मातृभूमिबाट निष्काशित गर्नु र द्वितीय– इजरायलद्वारा इरानमाथि आक्रमण गर्नु नै हो । त्यसकारण अमेरिका तथा इजरायलको विश्वव्यापी रूपमा भर्त्सना गर्नुपर्ने आवश्यकता छ । त्यस सन्दर्भमा यो कुरा पनि उल्लेखनीय छ कि नेपाल सरकारले त्यसबारे सधैँ झैँ अहिले पनि स्पष्ट नीति अपनाएको छैन र सामान्य प्रकारले त्यहाँ शान्तिस्थापना गर्नुपर्ने कुरामा नै जोड दिएको छ ।
अहिले इजरायलले इरानले आणविक हतियार बनाउन थालेको हुनाले नै त्यो योजनालाई ध्वस्त गर्नका लागि इरानमाथि आक्रमण गरेको बताएको छ । अवश्य पनि आणविक हतियारका कारण सम्पूर्ण मानवजातिलाई नै गम्भीर खतरा उत्पन्न भएको छ । त्यसैले हामीले पुनः कुनै राष्ट्रले आणविक हतियार बनाउने होइन, विश्वव्यापी रूपमा आणविक हतियार नष्ट गर्नुपर्ने आवश्यकतामा जोड दिँदै आएका छौँ । अहिले पनि हाम्रो त्यही नीति रहेको छ । स्वयम् इजरायलसित पनि आणविक हतियार रहेको कुरा बताइन्छ यद्यपि आधिकारिक रूपमा त्यो कुरा पुष्टि भने भएको छैन । त्यो अवस्थामा खालि एकतर्फी रूपमा इरानले आणविक हतियार बनाउन थालेको हुनाले त्यसमाथि आक्रमण गर्ने कुरालाई अवश्य पनि सही र न्यायसङ्गत भन्न सकिन्न । स्पष्ट छ कि इजरायलद्वारा इरानमाथि आक्रमणको उद्देश्य एकातिर, प्यालेस्टाइनी जनतालाई सम्पूर्ण रूपले उनीहरूको न्यायपूर्ण अधिकारबाट वञ्चित गर्नु र अर्कातिर, मध्यएसियामा इजरायलको माध्यमद्वारा मध्यएसियामा अमेरिकी साम्राज्यवादको प्रभुत्व कायम गर्नु नै हो । त्यसैले हामीले अमेरिका वा इजरायलको त्यस प्रकारको साम्राज्यवादी नीतिको कडा शब्दमा विरोध गर्दछौँ ।
इरानले गाजा क्षेत्रमा प्यालेस्टाइनीमाथि ठुलो पैमानामा नरसंहार गरिरहेको छ । अमेरिका र इजरायलसमेतको रणनीति गाजा क्षेत्रमा प्यालेस्टाइनी जनताको बसोबासलाई सम्पूर्ण रूपले समाप्त गर्नु नै रहेको छ । त्यहाँ अहिलेसम्म पचास हजारभन्दा बढी मानिस—जसमा ठुलो सङ्ख्यामा महिला र केटाकेटी पनि छन्—को हत्या भइसकेको छ र इजरायली सरकारले त्यहाँ खाद्यान्नको आपूर्तिमा पनि बाधा हाल्ने प्रयत्न गर्दै आएको छ । त्यहाँ अस्पताल र शिक्षण संस्थालाई पनि ठुलो सङ्ख्यामा नष्ट गरिएको छ । त्यो मानवीय समस्याप्रति पनि हाम्रो गम्भीर ध्यान जानुपर्ने आवश्यकता छ ।
इजरायलमा ठुलो सङ्ख्यामा नेपाली बस्दछन् । अहिले इरान र इजरायलको बिचमा भइरहेको युद्धका कारणले उनीहरूको सुरक्षाको प्रश्न पनि गम्भीर रूपमा अगाडि आएको छ । त्यसप्रति ध्यान दिनका लागि पनि हामीले नेपाल सरकारको गम्भीर ध्यान आकर्षित गर्न चाहान्छौँ ।”
