दाङ । मिलेनियम च्यालेन्ज कर्पोरेसन (एमसिसी) का विरुद्ध दाङका राजनीतिक दलहरूले २०७७ जेष्ठ २४ गते दिउँसो ३ बजे घोराहीको तुलसीपुर चोकमा विरोधसभा गर्ने भएका छन् । आज दाङमा कृयाशील राजनीतिक पार्टीहरूको संयुक्त बैठकले सो निर्णय गरेको हो ।

राजमो दाङको कार्यालय घोराहीमा बसेको बैठकले देशभक्त र राष्ट्रप्रेमी नेपालीहरूले राष्ट्रघाती एमसिसीको देशव्यापी विरोध गरिरहँदा पनि सरकारले आ.व. २०७७÷७८ को नीति तथा कार्यक्रम र बजेटमा त्यसलाई सामेल गरिएकोमा विरोध व्यक्त गरिएको छ । सरकारको यसखालको रवैयाका विरुद्ध खबरदारी आवश्यक भएकाले विरोधसभा गर्न थालिएको राजमो दाङका अध्यक्ष गणेश आचार्यले बताउनुभयो ।

बैठकमा नेकपा (मसाल) का प्रवक्ता भरत भण्डारी, राष्ट्रिय जनमोर्चा दाङका अध्यक्ष गणेश आचार्य, नेकपा (माले) का जिल्ला सचिव नेत्रप्रकाश पाण्डे, नेकपा (क्रान्तिकारी–माओवादी) का जिल्ला सेक्रेटरी रामजी चौधरी, देशभक्त जनगणतान्त्रिक मोर्चा नेपालका जिल्ला अध्यक्ष नरेन्द्र बन्जाडेलगायतको उपस्थिति रहेको थियोे ।