काठमाडौँ । हाल नेपाल कम्युनिस्ट पार्टी (मसाल) का महामन्त्री रहनुभएका मोहनविक्रम सिंहले कुनै बेला नेकपाको पार्टीसदस्यताका लागि कमलराज रेग्मीलाई निवेदन दिनुभएको थियो । पछिल्लो समयमा रेग्मी कम्युनिस्ट आन्दोलनबाट विचलित पनि हुनुभयो तर २०७२ सालमा आफ्ना गल्तीप्रति आत्मआलोचना गर्दै मसालमा फर्किनुभयो । रेग्मीको २०७४ चैत २२ गते निधन भइसकेको छ ।

मसालका महामन्त्रीको नाममा लेखिएको सो निवेदनमा के छ ? मसालको केन्द्रीय कार्यालय स्रोतबाट २०८२ जेठ २३ गते शुक्रबार युगदर्शनले सो पत्र प्राप्त गरेको छ । पाठकको जानकारीका लागि सो पत्र यहाँ जस्ताको तस्तै दिइएको छ ।

क. महामन्त्री

नेकपा (मसाल), केन्द्रीय कार्यालय

विषय : आत्मालोचनासहित पार्टीप्रवेश ।

म कम्युनिस्ट पार्टीको निर्माणकालदेखि नै कम्युनिस्ट आन्दोलनमा लागेको व्यक्ति हुँ । पार्टी र क्रान्तिको दौरानमा लगातार ४ वर्ष र पटक पटक गरी लगभग ८ वर्ष जेलमा बिताउनुपऱ्यो । जेलमा रहँदा मेरो स्वास्थ्य अत्यन्त खराब भयो । त्यो समयमा पार्टीमा फुट पनि पैदा भयो । पारिवारिक स्थिति अत्यन्त नाजुक र जटिल स्थितिमा पुऱ्याइदियो । त्यो स्थितिमा पार्टीमा रहेका केही नेतृत्वपङ्क्तिका साथीहरूले पनि जेलबाट निस्कनका लागि सम्झौतापरस्त नीति अपनाउन प्रेरित गरे । यो परिस्थिति रहेता पनि कम्युनिस्ट पार्टी र यसको नीतिमा अडिग रहनुपर्दथ्यो । त्यसमा म अडिग रहन सकिनँ । यसको लागि म नै जिम्मेवार छु ।

मैले यो समयमा यो पनि स्पष्ट गर्न जरुरी ठान्दछु कि राजा र पञ्चायती व्यवस्थाको नीतिमा लाग्दा कम्युनिस्ट पार्टी विरुद्ध कहिल्यै अहितमा लागिनँ । त्यस बेलाको अवस्थामा पनि कम्युनिस्ट पार्टीले देशमा सही भूमिकाको आकाङ्क्षा मेरो रहँदै आएको थियो ।

आज पनि राष्ट्र र जनताको मुक्ति (सर्वहारा, मजदुर, किसान) कम्युनिस्ट पार्टीले नै गर्दछ भन्ने कुरामा मेरो पूर्ण विश्वास छ । आज देशमा रहेका कम्युनिस्ट पार्टीका नाम रहेका पार्टीहरू कम्युनिस्टको मूल सिद्धान्तबाट विचलित भई अवसरवादी बाटो समातेका छन् । यसले देशको राष्ट्रियता र जनतालाई पनि नोक्सान पुऱ्याएको छ भने कम्युनिस्ट आन्दोलनलाई ठुलो क्षति पुग्न गएको छ । यो अवस्थामा नेपाल कम्युनिस्ट पार्टी (मसाल) ले कम्युनिस्ट सिद्धान्तको रक्षा र यो पार्टीले राष्ट्रमा खेलेको राजनैतिक भूमिकाले देश र जनताको मुक्ति हुनेछ भन्ने विश्वास लागेकाले मेरो गत कालमा रहेको गल्तीकमजोरीको आत्मालोचना गर्दै यस पार्टीमार्फत् जीवनको अन्तिम घडीमा कम्युनिस्ट आन्दोलनमा प्रवेश गर्न चाहन्छु ।

यस पार्टीमार्फत् मैले खेल्नुपर्ने भूमिकाका लागि पार्टीको विधान र अनुशासनमा रहेर पार्टीले दिने भूमिकालाई पनि निर्वाह गर्नेछु ।

मिति २०७२ साल भाद्र ९ गते

कमलराज रेग्मी