दाङ । राष्ट्रिय जनमोर्चाका अध्यक्ष चित्रबहादुर केसीले कोरोना भाइरसका कारण लगाइएको लकडाउनले गर्दा दैनिक ज्यालादारीमा काम गर्ने मजदुरहरूको जीवन कष्टकर भएको कुरा बताउनुभएको छ । राष्ट्रिय जनमोर्चा दाङको आयोजनामा २०७७ जेष्ठ २२ गते आयोजित “कोरोनाद्वारा उत्पन्न सङ्कट र अबको दैनिक जीवन” विषयक भर्चुअल अन्तर्कृयालाई सम्बोधन गर्दै अध्यक्ष केसीले सो अभिव्यक्ति दिनुभएको हो ।
‘कोरोना सङ्क्रमण विश्वव्यापी सङ्कट भए पनि यस प्रकारको सङ्कटलाई मानव समुदाय जित्दै आएको इतिहास छ’ उहाँले अगाडि ठोकुवा गर्नुभयो– ‘यसलाई पनि हामीले जित्ने छौँ ।’ उहाँले हतोत्साहित नभएर स्वास्थ्य सावधानीका साथ अगाडि बढ्न सबैलाई अपिल गर्नुभयो ।
‘लकडाउनलाई पनि अब परिमार्जन गर्दै जानुपर्छ’ उहाँले अगाडि भन्नुभयो– ‘परीक्षणको दायरा बढाउनुपर्छ ।’ उहाँले सो अवसरमा सरकारले प्रवासी नेपाली नागरिकका समस्या पनि समाधान गर्न तथा उत्पादनका कामलाइ पनि सँगसँगै अगाडि बढाउनुपर्नेमा पनि जोड दिनुभयो ।
राजमो दाङका अध्यक्ष गणेश आचार्यको अध्यक्षतामा सम्पन्न उक्त कार्यक्रममा अखिल नेपाल जनजाति सम्मेलनका महासचिव रामबहादुर बुढा, अखिल नेपाल युवक सङ्घका केन्द्रीय अध्यक्ष अनिलकिशोर घिमिरे, अखिल (छैठौं) का केन्द्रीय अध्यक्ष विमल पोख्रेल, नेकपा (मसाल) दाङका प्रवक्ता भरत भण्डारी, नेकपाका जिल्ला सचिवालय सदस्य सुरामणि बेल्बासे, उद्योग वाणिज्य महासङ्घ प्रदेश नं. ५ का उपाध्यक्ष हेमराज बन्जाडे, दाङ च्याम्बर्सका अध्यक्ष श्रीधर महरा, अखिल नेपाल जनजाति सम्मेलन दाङका अध्यक्ष रामबहादुर घर्ती, मूल प्रवाह अखिल भारत नेपाली एकता समाजका केन्द्रीय सदस्य त्रिभुवन भट्टराई र महेन्द्र बस्याल, अन्तर्राष्ट्रिय नेपाली एकता समाजका कृष्ण केसी, जापान नेपाली एकता समाजका हेमलाल गौतम, पत्रकार गोविन्द खड्का, ललिता पोख्रेल, प्रेम सुवेदीलगायतले मन्तव्य राख्नुभएको थियोे ।
राजमोका जिल्ला सचिव वसन्त पौडेलको सञ्चालनमा भएको कार्यक्रमको विषय प्रवेश जिल्ला अध्यक्ष गणेश आचार्यले गर्नुभएको थियोे ।
