काठमाडौँ । वरिष्ठ सङ्गीतकार तथा गायक गणेश रसिक अस्ताएका छन् ।
ललितपुरको हात्तीवनस्थित नेपाल क्यान्सर अस्पतालमा २०८२ जेठ १९ गते दिउँसो उनको निधन भएको पारिवारिक स्रोत तथा सङ्गीतकार सङ्घ दुबैले जनाएका हुन् ।
७८ वर्षीय रसिक गत पाँच वर्षदेखि प्रोस्टेट क्यान्सरबाट पीडित थिए । सङ्गीतकार बसन्त मुकारुङका अनुसार क्यान्सर अस्पतालमै रसिकको बिहान ११ बजेतिर निधन भएको हो ।
सङ्गीतकार सङ्घका अध्यक्ष अष्ट लामाले पनि रसिकको निधन भएको बताए ।
रसिककी एक मात्र छोरी बेलायतबाट फर्किएपछि दाहसंस्कार गरिने बताइएको छ । रसिकको शवलाई त्रिभुवन शिक्षण अस्पतालमा राखिने भएको छ ।
लगभग पाँच दशकअघि ॅलेकाली’ समूहबाट गायनमा उदाएका रसिक नेपाली गीतसङ्गीत क्षेत्रको बहुआयामिक व्यक्तित्व मानिन्छन् । उनको गीतलेखन र गायनमा नेपाली समाजको दुःख, सङ्घघर्ष, उन्नति र सपनाको सरल तर प्रस्तुति रहेको धेरैको ठम्याइ छ ।
उनको नेपाली साहित्यिक क्षेत्रमा कथा, कविता, उपन्यास, संस्मरण र निवन्ध विधाका दर्जनभन्दा बढी सङ्ग्रह प्रकाशित छन् ।
उनको जन्म भोजपुरको टेम्केमैयुङ गाँउपालिका वडा नं. २ छिनामखुको नौलागाँउमा बाबु नरोत्तम राई र आमा रत्नमाया राईको कोखबाट २००४ साल असोज ४ गते भएको हो ।
रसिकले बिएसम्मको औपचारिक शिक्षा हासिल गरेका छन् । सामान्य कर्मचारीको जागिरे हुँदै व्यावसायिक जीवन पार गरेका रसिकले विभिन्न विभाग र संस्थामा ३१ वर्षसम्म पदमा रही विविध जिम्मेवारी निर्वाह गरेका थिए ।
रत्न रेकर्डिङ संस्थानको अध्यक्ष तथा महाप्रबन्धक (२०३८–४०), सांस्कृतिक संस्थानको महाप्रबन्धक (२०४०–४६), साझा प्रकाशनको अध्यक्ष तथा महाप्रबन्धक (२०५२–५५), नेपाल सङ्गीत तथा नाट्य प्रज्ञा–प्रतिष्ठानको सदस्यसचिव (२०७२–७५) जस्ता प्राज्ञिक संस्थानको उच्च ओहोदामा जिम्मेवारी निर्वाह गरे ।
नेपाली गीतसङ्गीतको पहिलो पुस्ता नातिकाजी, अमर गुरुङ, बच्चु कैलाश, नारायणगोपाल, गोपाल योञ्जन, तारादेवी र अरुणा लामापछिको दोस्रो पुस्ताको होनहार प्रतिभा मानिन्छन् रसिक ।
