वीरेन्द्रनगर । अठारौँ गणतन्त्र दिवसको अवसरमा सुर्खेतमा कार्यक्रम सम्पन्न भएको छ ।
राष्ट्रिय जनमोर्चाका केन्द्रीय उपाध्यक्ष जनकराज शर्माको प्रमुख आतिथ्यमा २०८२ जेठ १५ गते बिहीबार जिल्ला कार्यालयको सभाहलमा सो कार्यक्रम सम्पन्न भएको हो ।
सो अवसरमा सम्बोधन गर्दै प्रमुख अतिथि शर्माले गणतन्त्रमाथि प्रतिगामीको हमला एकदम बढेर गएको बताउनुभयो ।
गणतन्त्रपछिका शासकको कुशासनका कारणले प्रतिगामी शक्तिको मनोबल बढेको बताउँदै उहाँले प्रतिगामी खतरालाई रोक्न सम्पूर्ण लोकतान्त्रिक गणतन्त्रका पक्षधर शक्तिहरू एकजुट हुनुको विकल्प नरहेको बताउनुभयो ।
राष्ट्रिय जनमोर्चाले प्रतिगामी खतरालाई गम्भीर रूपमा लिएको जानकारी दिँदै उहाँले यस विषयमा सम्पूर्ण लोकतान्त्रिक शक्तिहरू गम्भीर हुनुपर्ने आवश्यकतामा समेत उहाँले जोड दिनुभयो ।
कार्यक्रममा राजमो केन्द्रीय सदस्य रत्नविक्रम रानाप्यासी र राजमो कर्णाली प्रदेश सदस्य लालबहादुर नेपालीले पनि सम्बोधन गर्नुभएको थियो ।
सो अवसरमा अखिल नेपाल ट्र्ड युनियन महासङ्घ (अन्टुक) का केन्द्रीय सदस्य हिरालाल नेपालीको समेत आतिथ्य रहेको थियो ।
राजमो सुर्खेतका सचिव विष्णुप्रसाद शर्मा सञ्चालन तथा राजमो कर्णाली प्रदेश समितिका अध्यक्ष पूर्णबहादुर शाहीको अध्यक्षतामा उक्त कार्यक्रम अघि बढेको थियो ।
