काठमाडौँ । गृहमन्त्रालयले सङ्घसंस्था दर्ता, नियमन र व्यवस्थापनको नाममा नागरिक अधिकारलाई कुण्ठित गर्न विधेयक अगाडि बढाएपछि युवा गैरसरकारी संस्था महासङ्घ नेपालले आपत्ति जनाउदै आन्दोलनको घोषणा गरेको छ ।
२०८२ जेठ १४ गते बुधबार पत्रकार सम्मेलनको आयोजना गर्दै महासङ्घले सो जानकारी दिएको हो ।
महासङ्घका अध्यक्ष नारायण गिरीले भन्नुभयो– ‘पञ्चायती शासनशैलीभन्दा पनि कठोर र नागरिक स्वतन्त्रता कमजोर बनाउने गरी आएको सङ्घसंस्था दर्ता र नियमन र व्यवस्थापनसम्बन्धी संशोधन र एकीकरण विधेयक स्वेच्छाचारी, असान्दर्भिक र अस्वाभाविक छ ।’
गणतन्त्रको स्थापना, संविधानको निर्माण र कार्यन्वयनमा नेपालका नागरिक संस्थाको अतुलनिय भूमिका नजरअन्दाज गर्दै सरोकारवालको सहभागिताबिना स्वेच्छाचारी ढङ्गले अगाडि बढेको प्रस्तावित ऐनमा राखिएका प्रावधानप्रति आफूहरूको आपत्ति रहेको उहाँको भनाइ थियो ।
उहाँले भन्नुभयो–’अझै पनि पुरानो शासनका कानुन राष्ट्रिय निर्देशन ऐन–२०१८, सङ्घसंस्था दर्ता ऐन–२०३४, समाज कल्याण ऐन २०४९ बाट नेपाली नागरीक संस्थाहरू निर्देशित हुनु विडम्वना नै हो ।’
उहाँले सामाजिक क्षेत्रमा देखिएका समस्या न्यूनीकरणका लागि सरोकारवालाको सहभागितामा पुराना कानुनको आवश्यक शंशोधन वा खारेजी एक मात्रै विकल्प भएको बताउनुभयो ।
कार्यक्रममा महासङ्घका केन्द्रीय सदस्य महेन्द्र पराजुली र सचिव नरेश रिजालले पनि आआफ्नो धारणा राख्नुभएको थियो ।
सम्मेलनमा १६ दिने कार्यक्रमबारे जानकारी गराइएको थियो । आन्दोलनको कार्यतालिका यस प्रकार रहेको छ :
२०८२ जेठ १५ देखि २० गतेसम्म जिल्ला तथा प्रदेश समितिले जिल्ला प्रशासन कार्यालयमार्फत सरकारलाई ज्ञापनपत्र बुझाउने
२०८२ जेठ २१ गतेदेखि २४ गतेसम्म कार्यस्थलमा कालोपट्टी बाधेर विधेयकको विरोध प्रदर्शन गर्ने
२०८२ जेठ २५ गते महिला तथा बालबालिकामन्त्रीलाई ध्यानाकर्षण पत्र पेस गर्ने
२०८२ जेठ २६ गते गृहमन्त्रीलाई ध्यानाकर्षणपत्र पेस गर्ने
२०८२ जेठ २७ गते अर्थमन्त्रीलाई ध्यानाकर्षणपत्र पेस गर्ने
२०८२ जेठ २८ गते प्रधानमन्त्रीलाई ध्यानाकर्षणपत्र पेस गर्ने
२०८२ जेठ २९ गते नेपालमा नागरिक अधिकार सडक बहस कार्यक्रम माइतीघरमा गर्ने
२०८२ जेठ ३० गते गते साङ्केतिक विरोध तथा “नेपालमा नागरिक अधिकार : सम्भावना र चुनौती” विषयक बृहत अन्तरक्रिया कार्यक्रम गर्ने
२०८२ जेठ ३१ गते अन्य सङ्घसंस्था र महासङ्घसहित संयुक्त पत्रकार सम्मेलनमार्फत दोस्रो चरणको आन्दोलन घोषणा गर्ने
