काठमाडौँ । हालसम्म बुटवलमा सम्पन्न गर्ने भनिएको बौद्ध पुरातात्त्विक गोष्ठी काठमाडौँमा पनि हुने भएको छ ।

बौद्ध पुरातात्त्विक सहर निर्माण अभियानकी अध्यक्ष दुर्गा पौडेलले २०८२ जेठ १३ गते अबेर राती प्रेसवक्तव्य जारी गर्दै सो जानकारी दिनुभएको हो ।

गोष्ठीमा विषयसम्बन्धित विभिन्न विद्वान्हरूलाई आमन्त्रण गर्ने योजना रहेको बताउँदै सो वक्तव्यमा त्यसको मिति अभियानको बैठकले ठेगान गर्ने जानकारी दिइएको छ ।

यस्तो छ, प्रेसवक्तव्यको पूर्ण पाठ :
“१. बौद्ध पुरातात्त्विक सहर निर्माण अभियानले नेपालमा बौद्ध पुरातात्त्विक सहर निर्माणको लागि केही वर्षदेखि अभियान चलाउँदै आएको छ । त्यो सहरअर्न्तगत कपिलवस्तु, रुपन्देही र पश्चिम नवलपरासीका करिब डेढ सय प्राचीन बौद्ध ऐतिहासिक वा पुरातात्त्विक स्थानलाई मिलाएर बौद्ध पुरातात्त्विक सहर निर्माणको लागि हामीले जोड दिँदै आएका छौँ । त्यसो गरिएमा त्यो नेपालको मात्र होइन, विश्वको नै एउटा महत्त्वपूर्ण बौद्ध पुरातात्विक सहर हुन जानेछ । त्यसले नेपालको प्राचीन सभ्यतालाई विश्वमा भव्य रूपले प्रस्तुत गर्नुका साथै त्यो अन्तर्राष्ट्रिय महत्त्वको पर्यटन केन्द्र पनि बन्न जानेछ ।

त्यसबारे हामीले पहिले बुटवलमा विचारगोष्ठीको आयोजना गरेका थियौँ । त्यसका पछाडिको हाम्रो उद्देश्य बृहत्तर बौद्ध पुरातात्त्विक सहर निर्माणको पक्षमा जनमत तयार गर्नु र त्यसप्रति सरकारको ध्यान आकर्षित गर्नु पनि थियो । हाम्रो के मत रहेको छ भने एकपल्ट सरकारले त्यस प्रकारको योजना अगाडि सारेमा त्यसका लागि प्राविधिक वा आर्थिक साधन जुटाउन कुनै गाह्रो पर्ने छैन । देशभित्रका बौद्ध सङ्घसंस्थाबाट त्यसका लागि उत्साहप्रदः सहयोग प्राप्त हुनुका साथै संसारका बौद्ध देशबाट पनि त्यसका लागि प्रयाप्त सहयोग प्राप्त हुन सक्नेछ । त्यही उद्देश्यमाथि ध्यान दिएर हामीले त्यसबारे बुटवलमा विचारगोष्ठीको आयोजना गरेका थियौँ भने अब त्यसबारे काठमाडौँमा पनि बृहत्तर विचारगोष्ठीको आयोजना गर्ने हाम्रो कार्यक्रम रहेको छ ।

त्यो विचारगोष्ठीमा नेपालका साथै अन्तर्राष्ट्रिय स्तरका पनि बौद्ध इतिहास र संस्कृतिका विद्वान्लाई सामेल गर्ने हाम्रो योजना रहेको छ । त्यही कारणले त्यसको तयारीका लागि हामीलाई लामो समय लागेको छ । सम्भवतः अर्को सालको प्रारम्भको कुनै महिनामा हामीले त्यो विचारगोष्ठीको आयोजना गर्न सक्नेछौँ । हाम्रो समितिले बैठक बसेर त्यसको मिति ठेगान गर्नेछ । त्यसको लागि हामीले तपाईंहरूबाट समर्थन र सहयोगको लागि अपिल गर्दछौँ ।”