कालिकोट । राष्ट्रिय जनमोर्चाका केन्द्रीय उपाध्यक्ष जनकराज शर्माले नेपाली जनता अब रैती हुन नसक्ने बताउनुभएको छ ।
सोमबार कालिकोटको रास्कोटस्थित लेनिन बजारमा राष्ट्रिय जनमोर्चा, कालिकोटले आयोजना गरेको प्रतिगमनविरोधी कोणसभामा बोल्दै उपाध्यक्ष शर्माले अहिलेको २१ औँ शताब्दीमा जनता कसैको दास नबन्ने स्पष्ट पार्नुभयो ।
‘जनताले लामो संघर्ष गरेर, बलिदानी दिएर स्वतन्त्र नागरिक बनेका छन्, अब फेरि रैती बन्दैनन्’ शर्माले भन्नुभयो, ‘इतिहासले रछ्यानमा मिल्काएको प्रतिगामी शक्तिले टाउको उठाउन नखोजे हुन्छ ।’
‘प्रतिगामी षडयन्त्रका विरुद्ध संघर्ष गरौँ, गणतन्त्रको रक्षा गरौँ’ भन्ने नाराका साथ आयोजित कार्यक्रममा राजमो कालिकोटका संस्थापक देवजंग शाही, राजमो केन्द्रीय सदस्य कमलविक्रम शाही, राजमो कर्णाली प्रदेश अध्यक्ष पूर्णबहादुर शाही, राजमो कालिकोटका अध्यक्ष कृष्णबहादुर शाहीलगायतका वक्ताहरूले सम्बोधन गर्नुभएको थियो ।
कार्यक्रममा रक्तिम सांस्कृतिक अभियानका स्थानीय कलाकारहरूले संघीयता चाहिँदैन, चाहिँदैन बोलको देउडा गीत प्रस्तुत गरेका थिए ।
राजमो कालिकोटका उपाध्यक्ष मिनबहादुर शाहीको अध्यक्षमा सम्पन्न कार्यक्रममा वामपन्थी नेता जंगदेव शाही, राजमो सल्लाहकार अजयबहादुर गिरी, रणबहादुर शाही, गणेशबहादुर शाही, शर्मिला बुढा, अनुष्का शाही, अञ्जना उपाध्याय र कृतिका उपाध्यायलगायत नेता, कार्यकर्ताको उपस्थिती रहेको थियो ।
