काठमाडौं । कोराना भाइरसको संक्रमणबाट पाकिस्तानको सिन्ध प्रदेशका एक मन्त्रीको मृत्यु भएको छ ।
प्रदेशका मावन व्यवस्थापनमन्त्री गुलाम मुर्ताजा बालोचको मंगलबार मृत्यु भएको पाकिस्तानी सञ्चारमाध्यमले जनाएका छन् ।
उनको मृत्युको पुष्टि गर्दै सिन्धका मुख्यमन्त्री मुराद अली शाहले त्यसले सिन्ध सरकारलाई ठूलो क्षति पुर्याएको बताएका छन् ।
गत मे १४ तारिख उनमा कोरोना संक्रमण पुष्टि भएको थियो । त्यसपछि उनलाई कराँचीस्थित एक निजी अस्पतालमा आईसीयूमा राखेर उपचार गरिएको थियो ।
पाकिस्तानमा कोरोना भाइरस नियन्त्रणका लागि लगाइएको लकडाउन केही खुकुलो पारिएको छ । तर, संक्रमितको संख्या भने निरन्तर बढ्दो क्रममा छ ।
अहिलेसम्म पाकिस्तानमा ७६ हजारभन्दा धेरै मानिसमा कोरोना भाइरसको संक्रमण पुष्टि भइसकेको छ । १ हजार ६ सय २१ जनाको मृत्यु भइसकेको छ भने २७ हजार ११० जना मानिस सञ्चो भएका छन् ।
