दाङ । राष्ट्रिय जनमोर्चाका लुम्बिनी प्रदेश अध्यक्ष बोमबहादुर खत्रीले गणतन्त्रको रक्षा आजको मुख्य कार्यभार भएको बताउनुभएको छ ।
२०८२ वैशाख २७ गते शनिबार राजमो दाङद्वारा “वर्तमान राजनीतिक अवस्था र गणतन्त्र रक्षाको प्रश्न” विषयक अन्तरक्रियामा मन्तव्य राख्दै उहाँले यसतो बताउनुभएको हो ।
‘अहिले प्रतिगामी कित्ताबाट गणतन्त्रमाथि प्रहार भइरहेको छ’ उहाँले भन्नुभयो– ‘गणतन्त्रप्राप्तिका लागि नेपाली जनताको धेरै रगत बगेको छ । त्यो गणतन्त्र रक्षा गरेर मात्र यहाँभन्दा माथिल्लो व्यवस्थामा जान सकिनेछ ।’
कार्यक्रममा २०६२–६३ को जनआन्दोलनमा दाङ जिल्लाको नेतृत्व गरेका नेताहरूलाई आमन्त्रण गरिएको थियो । त्यसमध्येका एक हुनुहुन्थ्यो– नेकपा (मसाल) दाङका प्रवक्ता भरत भण्डारी ।
सो अवसरमा मन्तव्य राख्दै उहाँले भन्नुभयो– ‘२०४७ सालपछि प्रतिगामी खतरा छ भन्दा त्यो बेला कुनै दल स्वीकार नगरेको, आज पनि प्रतिगमनको खतरा छैन भनेर यस्तै लापरबाही रवैया अपनाउने हो भने गणतन्त्र सकिन धेरै दिन लाग्ने छैन ।’
नेकपा (एमाले) का केन्द्रीय लेखा आयोग सदस्य तथा तत्कालीन जिल्ला सचिव रेवतीरमण शर्माले भन्नुभयो– ‘अहिले नै गणतन्त्र रक्षाको विषय उठाउनुपर्छ भन्ने नलागेको, विरोध आउँछन्, विरोध गर्न पाउनुपर्छ तर हामीले पार्टीका फोरममा हाम्रा समस्याबारे कुरा उठाउनुपर्दछ ।’
नेपाली काङ्ग्रेसका तत्कालीन जिल्ला सभापति वीरकेश्वरी गौतमले भन्नुभयो– ‘हामीले आन्दोलन गऱ्यौँ तर त्यसको व्यवस्थापन गर्न सकेनौँ । जनमत सङ्ग्रह नगरी राजालाई संविधानबाट फालेका कारण पनि समस्या भएको हो ।’
राजमो दाङका अध्यक्ष गणेश आचार्यको अध्यक्षतामा भएको कार्यक्रममा नेकपा (माओवादी केन्द्र) का सचिव विश्वराज आचार्य, क्रान्तिकारी कम्युनिस्ट पार्टीका पोलिटब्युरो सदस्य समीर केसी, नेकपाका केन्द्रीय सदस्य पाटन सी, प्रेस स्वतन्त्र सेनानी तथा वामपन्थी चिन्तक सुशील गौतम, जिल्ला बार एकाइ दाङका उपाध्यक्ष नुमानन्द आचार्य, नागरिक समाज दाङका पूर्व अध्यक्ष चन्द्रराज पन्त, नेपाल पत्रकार महासङ्घका केन्द्रीय सचिव सबिन प्रियासनलगायतले मन्तव्य राख्नुभएको थियो ।
राजमो दाङका जिल्ला सदस्य कपिलदेव खनालको स्वागत मन्तव्यबाट सुरु भएको कार्यक्रमको विषय प्रवेश काशिनाथ पोख्रेलले गराउनुभएको थियो भने सञ्चालन रामबहादुर जिएमले गर्नुभएको थियो ।
