दाङ । दाङको तीन स्थानमा प्रतिगामी खतरा विरुद्ध सभा सम्पन्न भएको छ ।
राष्ट्रिय जनमोर्चा दाङको आयोजनामा २०८२ वैशाख २६ गते शुक्रबार बबईको हापुरे, शान्तिनगरको जुम्लेकुला र दङ्गिशरणको बालापुरमा सभा सम्पन्न भएका हुन् ।
कार्यक्रमलाई सम्बोधन गर्दै नेकपा (मसाल) दाङका प्रवक्ता भरत भण्डारीले नेपालको अहिलेको संविधानले राजतन्त्रलाई नचिन्ने बताउनु भयो ।
‘२०४७ को संविधानले राजालाई स्थान दिएको थियो । त्यसैले हामीले त्यसको विरोध गर्दै संविधानसभाको लागि २०४८ सालको चुनाव बहिस्कार गरेका थियौँ’ उहाँले भन्नुभयो– ‘तर अब राजतन्त्र कुनै हालतमा आउन सक्दैन ।’
त्यस्तै, राजमो केन्द्रीय सदस्य तथा दाङ जिल्ला अध्यक्ष गणेश आचार्यले गणतन्त्रको विकल्प राजतन्त्र नभएर जनगणतन्त्र, नयाँ जनवाद र समाजवाद भएको स्पष्ट पार्नुभयो ।
कार्यक्रममा अखिल नेपाल किसान महासङ्घ (अप्फा) दाङका अध्यक्ष ऋषिराम पौडेल र राजमो दाङका जिल्ला सदस्य ईश्वरी भण्डारीले पनि मन्तव्य राख्नुभएको थियो ।
