काठमाडौं । राष्ट्रिय जनमोर्चाले संघीयता सम्बन्धी सम्पूर्ण प्रावधानहरु खारेज गर्न संविधान संशोधनको प्रस्ताव दर्ता गर्दैछ । सो सम्बन्धी प्रस्ताव लिएर राजमो नेताहरु संसद सचिवालय पुग्नुभएको छ ।
नेपालको संविधान २०७२ मा उल्लेखित संघीयता सम्बन्धी सबै प्रावधान हटाउन प्रस्ताव दर्ता गर्न लागिएको अध्यक्ष चित्रबहादुर केसीले जानकारी दिनुभयो । प्रस्ताव दर्ता गर्न अध्यक्ष केसी, उपाध्यक्ष एवं सांसद दुर्गा पौडेल, अखिल नेपाल कानुन व्यवसायी संघका महासचिव अधिवक्ता लक्ष्मणदेव पाण्डे र सांसद पौडेलका सहयोगी अधिवक्ता रामप्रसाद भुसाल संसद सचिवालय जानुभएको हो ।
सरकारले नेपालको नयाँ नक्सा अनुरुप निशानछाप परिवर्तनका लागि संविधान संशोधन प्रस्ताव दर्ता गरेपछि सोमबार मधेशवादी दलहरु राजपा र समाजवादीले पनि संविधान संशोधन प्रस्ताव दर्ता गरेका छन् ।
निशानछाप सम्बन्धी प्रस्तावको ध्यान अन्यत्र मोड्ने गरी अन्य प्रस्ताव नल्याउन आग्रह गरेको राजमोले संशोधनको ढोका खुलेपछि अब आफूहरुले पर्खिबस्न आवश्यक नरहेको निष्कर्षसहित संशोधन प्रस्ताव लिएर संसद सचिवालय पुगेको हो ।
‘संविधानमा रहेको संघीयता सम्बन्धी प्रावधान हटाउन हामीले पहिले देखि नै संशोधनको तयारी गरेका थियौं । अहिले निशानछापमा संशोधनका लागि प्रस्ताव दर्ता भएपछि अन्य विषय नघुसाउन र संशोधनको ढोका नखोल्न हामीले आग्रह गरेका हौँ’ अध्यक्ष केसीले भन्नुभयो, ‘तर, मधेशवादी दलहरुले संशोधनको ढोका खोलेका छन् । हामीले अब पर्खिरहन पर्छ भन्ने छैन ।’
अध्यक्ष केसीले नेपालको संविधानमा रहेका समावेशिता, समानुपातिक प्रणाली, धर्म निरपेक्षता, गणतन्त्र जस्ता विषयलाई आफ्नो पार्टीले समर्थन गरेको जानकारी दिँदै संघीयताले देशको राष्ट्रियता कमजोर हुँदै गएको र जनतालाई चर्को आर्थिक बोझ परेको निष्कर्षसहित संविधान संशोधनको प्रस्ताव गरेको हो ।
यस अघि अध्यक्ष केसीले सोमबार एक विज्ञप्ति प्रकाशित गरी निशानछापबारेको संशोधन प्रस्ताव पेश भएका बेला अन्य विषयमा संविधान संशोधन नगर्न अपिल गर्नुभएको थियो । अन्य कुनै पक्षले संविधानमा संशोधनसम्बन्धी कुनै प्रस्ताव ल्याएमा आफ्नो पार्टीले पनि संघीयताको खारेजसम्बन्धी आफ्नो संशोधन प्रस्तावलाई तत्काल नै प्रस्तुत गर्ने केसीले स्पष्ट पार्नुभएको थियो ।
निशानछाप सम्बन्धी संविधान संशोधनमा अन्य विषय घुसाउनु गलतः केसी
केसीले विज्ञप्ति प्रकाशित गरेको केहीबेरमै सोमबार मधेशवादी दलहरु राजपा र समाजवादी दलले आफ्ना एजेण्डा संविधानमा घुसाउन संविधान संशोधन प्रस्ताव दर्ता गराएका थिए ।
यस्तै, केही दिन अघि प्रधानमन्त्री केपी शर्मा ओलीले बोलाएको सर्वदलीय बैठकमा पनि अध्यक्ष केसीले संविधान संशोधनको ढोका नखोल्न आग्रह गर्नुभएको थियो । यदी संशोधनको ढोका खुले आफूहरुले पनि संघीयता खारेजीको प्रस्ताव दर्ता गर्ने केसीले बताउनुभएको थियो ।
जब केसीले भन्नुभयो, संविधान संशोधनको ‘पेण्डुरम बक्स’ अहिले नखोलौं…
