झिमरुक (प्युठान) । प्युठानमा राष्ट्रिय जनमोर्चा झिमरुक पालिकाको आयोजनामा जनचेतनामूलक सभा सम्पन्न भएको छ ।
२०८२ वैशाख २२ गते आइतबार प्रतिगामी खतराको विरोध गर्दै झिमरुकको मच्छीमा सो कार्यक्रम सम्पन्न हो ।
कार्यक्रममा प्रमुख अतिथि राजमो केन्द्रीय उपाध्यक्ष तथा प्रवक्ता दुर्गा पौडेल हुनुहुन्थ्यो ।
सो अवसरमा मन्तव्य राख्दै उहाँले यो देशका स्वास्थ्य र शिक्षाजस्ता आधारभूत विषयलालाई निजीकरण गर्दै राज्य आफ्नो दायित्वबाट पन्छिँदै गएको बताउनुभयो ।
त्यस्तै, देशमा बेरोजगारको स्थिति पैदा भएको र युवाजति सबै विदेश पलायन हुन बाध्य भएको उहाँको धारणा थियो ।
‘सत्ता सञ्चालकहरूले राष्ट्रघाती विभिन्न कार्यका साथै भ्रष्टाचार, अनियमितता बढाएको कारणले गर्दा प्रतिगमनका मतियार राजावादीले टाउको उठाउँदै देशमा अराजकता फैलाएको छ’ पौडेलले अगाडि भन्नुभयो– ‘त्यसका विरुद्ध लड्न सबै नेपालीलाई एकजुट हुन अनुरोध गर्दछौँ ।’
कार्यक्रममा राजमो लुम्बिनी प्रदेशका सल्लाहकार सुरेश थापाले नेपाललाई आवश्यकता नै नभएको सङ्घीयता ल्याएर नेपाललाई आर्थिक र भौतिक रूपमा समेत कमजोर बनाएको दाबी गर्नुभयो ।
सो अवसरमा राजमो केन्द्रीय सदस्य नारायण जिसी, अखिल नेपाल युवक सङ्घका केन्द्रीय कोषाध्यक्ष कमल पौडेल, नेकपा (मसाल) ५ नं. ब्युरो प्रवक्ता तिलक जिसी, राजमो प्युठानका अध्यक्ष ज्ञामुराम न्यौपानेलगायतले मन्तव्य राख्नुभएको थियो ।
कार्यक्रममा रक्तिमका कलाकारद्वारा जनवादी गीत र नृत्य प्रस्तुत गरिएको थियो ।
राजमो झिमरुकका अध्यक्ष टिकाबहादुर जिसीको अध्यक्षतामा तथा राजमो जिल्ला सदस्य सीताराम पोखरेलको स्वागतमा अघि बढेको सो कार्यक्रमको सञ्चालन राजमो लुम्बिनी प्रदेशका सल्लाहकार वासुदेव पोखरेलले गर्नुभएको थियो ।
