सिन्धुलीमाढी । सिन्धुलीका राजनीतिक दलहरूले कोरोना भाइरसको सङ्क्रणमाझ उत्पन्न बेथिति नियन्त्रण गर्न माग गरेका छन् । यस सम्बन्धमा उनीहरूले सिन्धुलीका प्रमुख जिल्ला अधिकारीलाई २०७७ जेष्ठ १९ गते ध्यानाकर्षण पत्रसमेत बुझाएका छन् ।
ध्यानाकर्षण पत्रमा प्यान इन्टरनेसनललगायत विभिन्न आइएनजिओले रेडक्रस स्थानीय एनजिओ मार्फत् गरेको अनियमितताको छानबिन, मूल्यवृद्धि नियन्त्रण, कमलामाई नगरपालिकामा राहतमा भएको अनियमितताको छानबिन, सरकारी गाडीहरूको दुरूपयोग नियन्त्रण, पिसिआर टेस्टको माग, पर्याप्त आइसोलेसनको व्यवस्था, व्यवस्थित क्वारेन्टाइनको माग, नियमित स्वास्थ्य परीक्षण, सुरक्षाकर्मीका लागि पिपिई सेटको उपलब्धता, कृषकका लागि मल, बिउको उपलब्धता, स्थानीय बजार दुई घण्टाको लागि खुल्ला, भूकम्प पीडितको किस्ता नियमित भुक्तानी, जिल्ला दररेटको नियमन, बैङ्क तथा वित्तीय संस्थाबाट लिइएको ऋणको ब्याज मिनाहा, जनतामाथिका विभिन्न करको मिनाह, सरकारद्वारा वितरित औषधिको निःशुल्क वितरण, यस्तो वितरणको सार्वजनिक जानकारी, सीमा समस्याको कूटनीतिक समाधान र भ्रष्टाचारको अन्तजस्ता विषय समेटिएको छ ।
ध्यानाकर्षण पत्रमा राष्ट्रिय जनमोर्चाका जिल्ला सचिव हिरा श्रेष्ठ, नेकपा (क्रान्तिकारी–माओवादी) का जिल्ला सदस्य हरि बस्नेत, देशभक्त जनगणतान्त्रिक मोर्चाका जिल्ला सचिव बालकृष्ण थापा, नेपाली काङ्ग्रेसका जिल्ला सभापति उज्ज्वलप्रसाद बराल, जनता समाजवादी पार्टीका जिल्ला अध्यक्ष विमल तिमिल्सिना र राष्ट्रिय प्रजातन्त्र पार्टीका ईन्द्रबहादुर भुजेलको हस्ताक्षर रहेको छ ।
