दाङ । राष्ट्रिय जनमोर्चाका लुम्बिनी प्रदेश अध्यक्ष बोमबहादुर खत्रीले लोकतन्त्र स्थापनापछि सत्ताको नेतृत्व गर्ने दलले जनतामाथि गरेको गद्दारीका कारण प्रतिगामी विचार उठेको धारणा व्यक्त गर्नुभएको छ ।
राजमो दाङले २०८२ वैशाख २१ गते लमहीमा आयोजना गरेको प्रतिगामी खतरा विरुद्धको कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।
‘सत्ता सञ्चालन गरिरहेका दलहरूले जनतामाथि गद्दारी गरे’ उहाँले भन्नुभयो– ‘फलस्वरूप जनतामा चरम असन्तुष्टि फैलियो र त्यही कारण प्रतिगामी विचार उठिरहेको छ ।’
उहाँले अबको युगमा राजतन्त्रको पुनरुत्थान सम्भव नभएको बताउनुभयो ।
‘तर सत्ताको नेतृत्व गर्ने दलहरू सुध्रिनु आवश्यक छ । गणतन्त्रको रक्षा गरिनुपर्दछ र सङ्घीयता खारेज गरी स्थानीय तहलाई अधिकारसम्पन्न बनाइनुपर्दछ’ उहाँले भन्नुभयो ।
‘प्रतिगामी खतराका विरुद्ध सङ्घर्ष गरौँ, गणतन्त्रको रक्षा गरौँ’ नाराका साथ राजमोले सो कार्यक्रम सञ्चालन गरेको थियो ।
कार्यक्रमका अर्का वक्ता राजमो दाङका अध्यक्ष गणेश आचार्यले गणतन्त्रको साथमा चोरबाटोमा घुसाइएको सङ्घीयताले गणतन्त्रलाई बद्नाम गरेका कारण प्रतिगामी विचार बढेको हुनाले सङ्घीयता फालेर गणतन्त्रको रक्षा गर्नु आवश्यक छ ।
राजमो लमही नगर समितिका उपाध्यक्ष बासुदेव भट्टराईको अध्यक्षतामा अघि बढेको उक्त कार्यक्रममा उपस्थित जनसमुदायलाई लमही नगर इन्चार्ज ठाकुर भण्डारीले स्वागत गर्नुभएको थियो ।
कार्यक्रमको सञ्चालन बसन्त आचार्यले गर्नुभएको थियो ।
