केरसिंह अदै, तौलिहवा ।
राष्ट्रिय जनमोर्चा कपिलवस्तुले प्रतिगामी खतराको विरोध तथा गणतन्त्र रक्षाका लागि सप्ताहव्यापी कार्यक्रमको उद्घाटन गरेको छ ।
२०८२ वैशाख २० गते शनिबार बुद्धभूमि नगरपालिकाको भेलाइमा सो कार्यक्रमको उद्घाटन गरिएको हो ।
कार्यक्रमलाई सम्बोधन गर्दै राजमो कपिलवस्तुका जिल्ला अध्यक्ष रामप्रसाद बेलबासेले प्रतिगमन विरुद्ध सचेत हुनुपर्ने आवश्यकतामा जोड दिनुभयो ।
दलहरूको भ्रष्टाचार र अनियमितताका कारण यो व्यवस्था बदनाम हुँदै गएको बताउँदै उहाँले गणतन्त्रको विकल्प राजतन्त्र हुन नसक्ने ठोकुवा गर्नुभयो ।
अर्का वक्ता जातीय समता समाजका केन्द्रीय सदस्य खगेश्वर सुनारले भर्खरका युवाले निरङ्कुश राजतन्त्र नभोगेको र इतिहाससमेत नजानेको बताउनुभयो
धेरैपटक संवैधानिक राजतन्त्र मान्दामान्दै पनि राजा निरङ्कुश बनेको उदाहरण दिँदै उहाँले राजतन्त्र प्रतिगामी चरित्रमा पतन भइसकेको बताउनुभयो ।
त्यस्तै, नेकपा (मसाल) कपिलवस्तुका जिल्ला प्रवक्ता माधव भाटक्षत्रीले सङ्घीयता विरुद्ध आन्दोलन सफल हुँदै गएको बताउँदै देश ऋणमा डुब्दै गएको, आर्थिक अवस्था डामाडोल भएको तथा युवाशक्ति विदेश पलायन हुँदै गइरहेको चित्र प्रस्तुत गर्नुभयो ।
राजमो कपिलवस्तुले भोलि वैशाख २१ गतेदेखि दुईओटा टोली बनाएर जिल्लाव्यापी कार्यक्रम सञ्चालन गर्ने जानकारी दिएको छ ।
