काठमाडौँ । विद्यालय शिक्षा सम्बन्धी कानूनलाई संशोधन र एकीकरण गर्न बनेको विधेयकलाई यसै अधिवेशनबाट पारित गरिने भएको छ।
राष्ट्रपति रामचन्द्र पौडेलद्वारा प्रस्तुत सरकारको आगामी आर्थिक वर्षको नीति तथा कार्यक्रममा सो घोषणा गरिएको हो।
२०८४ भित्र सबै बालबालिकाले आधारभूत शिक्षा पाउने व्यवस्था गरिने भएको छ।
राष्ट्रपति शैक्षिक सुधार कार्यक्रमलाई परिमार्जन गरी राष्ट्रिय शैक्षिक सुधार कार्यक्रमको रुपमा सुदृढ गरिने नीति तथा कार्यक्रममा उल्लेख छ।
पाठेघरको क्यान्सर विरुद्धको एचपीभी खोपलाई नियमिति खोप कार्यक्रममा समावेश गरिने
यस्तै, महिलाहरूमा हुने पाठेघरको क्यान्सर विरुद्धको एचपीभी खोपलाई नियमिति खोप कार्यक्रममा समावेस गरिने भएको छ। यस्तै, १४ वर्ष मुनिका बालबालिकालाई क्यान्सर उपचार सेवा निःशुल्क हुने व्यवस्था मिलाइने सरकारले नीति तथा कार्यक्रममार्फत जानकारी दिएको छ।
सातै प्रदेशमा कम्तिमा एक सरकारी अस्पतालमा विशेषज्ञ क्यान्सर उपचार सेवा विस्तार गरिने राष्ट्रपति रामचन्द्र पौडेलले घोषणा गरेका छन्।
सरकारको नीति तथा कार्यक्रममा निरोगी नेपालको अवधारणा अनुरुप नसर्ने रोगको पूर्व पहिचान, परामर्श र उपचारका लागि फागुन महिनालाई नसर्ने रोग स्क्रिनिङ्ग महिना घोषणा गरी कार्यक्रमहरु सञ्चालन गरिने उल्लेख छ।
आयुर्वेद स्वास्थ्य तथा योग ध्यान पर्यटन प्रवद्र्धन गरिनेछ। आयुर्वेद चिकित्सा पद्दतिको प्रवद्र्धन र आयुर्वेद जनशक्ति विकासका लागि राष्ट्रिय आयुर्वेद अध्ययन प्रतिष्ठान स्थापना गरिनेछ।
विशेषज्ञ एवं सघन उपचार सेवामा पहूँचका लागि सातै प्रदेशमा सघन जलन उपचार सेवा र राष्ट्रिय गंगालाल हृदय केन्द्रको प्राविधिक समन्वयमा सातै प्रदेशमा मुटुरोग उपचार सेवा विस्तार गरिने जनाइएको छ।
