काठमाडौँ । प्रगतिशील पत्रकार सङ्घले शिक्षक आन्दोलनमा घाइते आन्दोलनकारी र पत्रकारको निःशुल्क उपचार गर्न माग गरेको छ ।
अध्यक्ष श्यामलाल पोखरेलको हस्ताक्षरमा २०८२ वैशाख १४ गते प्रेसवक्तव्य जारी गर्दै प्रगतिशीलले सो माग गरेको हो ।
वैशाख १४ गते प्रशासनले गरेको दमनबाट दर्जनौँ शिक्षक तथा प्राइम टेलिभिजनकी पत्रकार सबिना कार्की घाइते भएपछि प्रगतिशीले वक्तव्य जारी गरेको थियो ।
शिक्षकका आन्दोलन न्यायपूर्ण भएको ठहर गर्दै वक्तव्यमा सो माग यथाशीघ्र पूरा गर्न सरकारसित प्रगतिशीलले अनुरोध गरेको छ ।
यस्तो छ, प्रेसवक्तव्यको पूर्ण पाठ :
“नेपाल शिक्षक महासङ्घको नेतृत्वमा गत चैत २० गतेदेखि राजधानीकेन्द्रित आन्दोलन सञ्चालन भइरहेको छ । पटकपटकका भएका सम्झौताअनुसार सरकारले विद्यालय शिक्षा ऐन नल्याएपछि शिक्षकहरू यतिखेर आन्दोलनमा आएका हुन् । निरङ्कुश पञ्चायती कालको शिक्षा ऐनलाई विस्थापित गर्दै नयाँ शिक्षा ऐन ल्याउनुपर्ने शिक्षकका माग न्यायपूर्ण भएको आफैमा स्पष्ट छ ।
सही शिक्षाबिना देशले प्रगति गर्न सक्दैन । त्यसैले शिक्षा र शिक्षकको विषयमा राज्यपक्ष गम्भीर बन्नुपर्दछ । शिक्षण पेसालाई सम्मानित र आकर्षक बनाउन राज्यपक्षको ध्यान जानुपर्दछ । हामी सरकारसित शिक्षक आन्दोलनका माग यथाशीघ्र पूरा गर्न आग्रह गर्दछौँ ।
आज वैशाख १४ गते शिक्षक आन्दोलनमाथि प्रशासनद्वारा दमन भएको छ । त्यस क्रममा दर्जनौँ शिक्षक र आन्दोलनको समाचार कभरेज गर्न पुग्नुभएकी प्राइम टेलिभिजनकी पत्रकार सबिना कार्की घाइते हुनुभएको छ । उहाँको आँखामा गम्भीर चोट लागेको छ ।
हामी शिक्षक आन्दोलनप्रति भएको दमनको भत्सर्ना गर्दछौँ । त्यसका साथै घाइते शिक्षक तथा पत्रकारको निःशुल्क उपचारको व्यवस्थापन गर्न सरकारसित माग गर्दछौँ ।”
