काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले देशमा बढ्दो भ्रष्टाचारबारे व्यङ्ग्य गर्दै भन्नुभएको छ– ‘एउटा एयरपोर्ट बनाउँदा दश अर्ब लुड्याउनी ?’
२०८२ वैशाख १४ गते आइतबार प्रतिनिधिसभा बैठकको विशेष समयमा बोल्दै उहाँले यस्तो व्यङ्ग्य गर्नुभएको हो ।
‘देश अहिले भ्रष्टाचारको चरमचुलीमा पुगेको छ’ उहाँले भन्नुभयो– ‘एउटा एयरपोर्ट बनाउँदा दश अर्ब लुड्याउनी ?’
उहाँले यस्तो भ्रष्टाचार देशभित्रैकाले गरेको स्पष्ट पार्नुभयो ।
‘भनेपछि त्यो बाहिरकाले खाएको छ ? विदेशकाले खाएको छ ?’ उहाँले प्र्रश्न गर्नुभयो ।
देशमा भ्रष्टाचार चरमचुलीमा पुगेको, शिक्षकको समस्या त्यस्तै रहेको उदाहरण प्रस्तुत गर्दै अध्यक्ष केसीले यिनै कारणले लोकतन्त्र, गणतन्त्र र धर्मनिरपेक्षतामाथि कालो बादल मडारिएको बताउनुभयो ।
मन्तव्यको क्रममा उहाँले हिँजो लोकतन्त्र, गणतन्त्रका लागि लडेकाहरूले पुराना दुःखकष्ट बिर्सेर विशुद्ध सत्ता र शक्तिको दुरुपयोग गरेको दाबीसमेत गर्नुभयो ।
उहाँले भ्र्रष्टाचार मच्याउने गैरजिम्मेवार प्रवृत्तिबाट सत्ताधारीहरू बच्नुपर्ने बताउनुभयो ।
‘विगतका गल्तीकमचोरीबारे जनतासित माफी मागेर नयाँ बाटो हिँड्नुपर्छ’ उहाँले सत्ताधारी पार्टीको सम्बन्धमा भन्नुभयो ।
अध्यक्ष केसीले अगाडि भन्नुभयो– ‘हेर्दाहेर्दै गणतन्त्र, लोकतन्त्र र धर्मनिरपेक्षता समाप्त भयो भने त्यसलाई प्राप्त गर्न कैयौँ समयसम्म नेपाली जनताले कुर्बानी गर्नुपर्नेछ । त्यसैले यसबारे सजग होऔँ ।’
राजा नाम मात्रका हुँदैनन्
मन्तव्यको क्रममा राजनीतिक वृत्तमा केही नगर्ने नाम मात्रका मानार्थ राजतन्त्रको चर्चा चलेकोमा त्यसको उहाँले खण्डन गर्नुभयो ।
‘मोहन शमशेरले त्रिभुवनलाई दिल्लीबाट फर्काएर ल्याउँदा नाम मात्रको राष्ट्रप्रमुख बन्छु भनेको होइन रु’ उहाँले भन्नुभयो– ‘पछि मोहन शमशेरले प्रयोग गरेको सत्ता त्रिभुवनले प्रयोग गरे कि आन्दोलनकारीले ?’
२०१७ सालमा तत्कालीन राजा महेन्द्रले गरेको राजनीतिक कूको स्मरण गर्दै उहाँले त्यसपछिका तिस वर्षसम्म नेपाली जनताले व्यहोर्नुपरेको कालरात्रीबारे मन्तव्य उल्लेख गर्नुभयो ।
नारायणहिटी हत्याकाण्डपछि ज्ञानेन्द्र पनि नाम मात्रको राष्ट्रप्रमुख बन्न नसकेको स्पष्ट पार्दै उहाँले २०५९ सालको कदम विरुद्ध २०६२–६३ सालको आन्दोलन चलेको र त्यो आन्दोलनले राजतन्त्र समाप्त पारेको इतिहास उहाँले स्मरण गर्नुभयो ।
गणतन्त्रवादीहरू मिल्नुपर्दछ
मन्तव्यको क्रममा उहाँले आफ्ना कमीकमजोरी सच्याउँदै गणतन्त्रवादीहरू मिल्नुको विकल्प नरहेको उहाँले बताउनुभयो ।
‘लोकतन्त्र, गणतन्त्र र धर्मनिरपेक्षतामाथि जुन खालको कालो बादल मडारिरहेको छ’ उहाँले भन्नुभयो– ‘त्यसका बारेमा सबै राजनीतिक पार्टीहरू, खासगरी गणतन्त्रवादी, लोकतन्त्रवादीहरू सचेत हुनपर्दछ ।’
यतिखेर सत्ताधारीले घुस खाने, राष्ट्रघात गरेकाले त्यसमाथि टेकेर प्रतिगामीले लोकतन्त्र, गणतन्त्र र धर्मनिरपेक्षता चाहिन्न, राजतन्त्र आएपछि देश स्वर्ग हुन्छ भनेर झुटको खेती भइरहेको उहाँको भनाइ थियो ।
उहाँले भन्नुभयो– ‘यस खालको झुटको खेतीबारे नेपाली जनता सचेत हुनुपर्दछ ।’
