काठमाडौँ । अमेरिकाले अनुदान सहयोग परियोजना मिलेनियम च्यालेन्ज कर्पोरेसन (एमसीसी) बन्द गर्ने निर्णय गरेको छ ।

अर्बपति इलोन मस्कले नेतृत्व गरिरहेको अमेरिकी सरकारको डिपार्टमेन्ट अफ गभर्नमेन्ट एफिसियन्सी (डीओजीई) ले एमसीसी बन्द गर्ने निर्णय गरेको हो ।

बन्द हुनेबारे मङ्गलबार नै एमसीसीका कर्मचारीहरूलाई इमेलमार्फत सूचित गरिएको रोयटर्सले जनाएको छ । कर्मचारीहरूलाई मे ५ तारिखदेखि प्रशासकीय बिदामा राखिने सम्भावना रहेको छ ।

पूर्व राष्ट्रपति जर्ज डब्लु बुसले २००४ मा स्थापना गरेको एमसीसीलाई बन्द गर्ने निर्णय ट्रम्प प्रशासनको खर्च कटौती नीतिअन्तर्गत हो । नेपाल पनि यो सहयोग लिने देश हो। एमसीसी परियोजना बन्द भएमा नेपालमा सञ्चालित परियोजनाका अन्तर्गतका काम पनि रोकिने छन् ।

एमसीसीका सम्पूर्ण कार्यक्रमहरू बन्द गरिने र कर्मचारी संख्या घटाइने रोयटर्सले उल्लेख छ ।

एमसीसीका वरिष्ठ अधिकारी क्येह किमले बैठकमा भनिन्, ‘विदेशी सहायता यो प्रशासनको प्राथमिकता होइन, त्यसैले एमसीसीको काम बन्द गर्नुपर्छ ।’

उनका अनुसार डिपार्टमेन्ट अफ गभर्मेन्ट एफिसिएन्सीका अधिकारीहरु गत साता नै एमसीसीको कार्यालयमा पुगेर नेतृत्वसँग छलफल सुरु गरेका थिए । एमसीसीले रोयटर्सको टिप्पणीमा कुनै प्रतिक्रिया भने दिइसकेको छैन ।

यसअघि नै ट्रम्प प्रशासनले करिब ४० अर्ब डलर वार्षिक सहायता वितरण गर्ने यूएसएडलाई पनि पनि विघटन गरिसकेको छ। एमसीसीले विकासशील मुलुकहरूसँग साझेदारी गर्दै विद्युत् आपूर्ति, सडक निर्माण जस्ता पूर्वाधारमा लगानी गर्दै आएको थियो ।

संस्था वर्षेनि करिब ९० करोड डलरको बजेटमा सञ्चालित थियो । एमसीसीका एक कर्मचारीका अनुसार केही निर्माण परियोजनाबाहेक सबै काम रोकिएको छ ।

सक्रिय परियोजनामा मंगोलियाको जलमल प्रशोधन प्लान्ट, सेनेगल र नेपालका विद्युत् प्रसारण परियोजना, र आइभरी कोस्टका विद्यालय निर्माण परियोजना समावेश छन् ।