काठमाडौँ । नेपाली कांग्रेसका महामन्त्री गगन थापाले बिचौलियाको पहुँच प्रधानमन्त्रीको बेडरुमसम्म पुगेको बताएका छन् ।
मंगलबार काठमाडौँमा बौद्धिक पेसाकर्मी अभियान परिषद्ले आयोजना गरेको कार्यक्रमलाई सम्बोधन गर्दै थापाले यस्तो बताएका हुन् ।
उनले अहिलेको अर्थतन्त्रमा बिचौलायाका कारण समस्या आएको बताए ।
‘प्राइभेट सेक्टर र बिचौलिया भनेको फरक कुरा हो। हाम्रो इकोनोमिमा अहिले समस्या भएको भनेको बिचौलियाको कारणले हो,’ उनले भने, ‘म यो प्रधानमन्त्री त्यो प्रधानमन्त्री भन्दिनँ बिचौलियाहरूको पहुँच प्रधानमन्त्रीको बेडरुमसम्म हुने भयो। नेतृत्वको बेडरुमसम्म हुने भयो।’
उनले राष्ट्र बैंकको गभर्नरको बारेमा छलफल हुँदा खुला रुपमै बिचौलियाको उम्मेदवार भनिने अवस्था आउनु दुखद् भएको बताए।
‘मलाई अहिलेसम्म थाहा थिएन। पहिला पहिला राष्ट्र बैंकको गभर्नरको बारेमा छलफल हुँदै गर्दा गभर्नर यो बन्ला कि त्यो बन्ला कि गभर्नर यसले बनाउला कि त्यसले बनाउला कि भन्नेकुरा हुन्थ्यो,’ उनले भने, ‘अब अहिले बिचौलियाको क्यान्डिडेट भनेर खुल्लम खुला बहस हुने, छलफल हुने अवस्था आउनु भनेको हामी कहाँनेर पुग्यौँ ?’
उनले दुई ठूला राजनीतिक दलहरु मिलेर सरकार बनाएपछि संविधानमा बदलाव ल्याउनेदेखि विकास निर्माणका कामलाई तिब्रता दिने अपेक्षा गरेपनि त्यसअनुसार काम हुन नसकेको जिकिर गरे।
‘हामीले के ठानेका थियौँ भने दुई वटा ठूला–ठूला पार्टी मिलेर सरकार बनिसकेपछि संविधानमा पनि केही कुरा बदलाव ल्याउने कुरा तत्काल प्रारम्भ गर्छौं,’ थापाले भने, ‘खासगरी गभर्नेन्समा व्यापक सुधार गर्छौं। तर बिस्तारै के लान थालेको छ भने देशलाई कंकडको स्पिड चाहिएको छ। आज एउटा, भोलि एउटा, पर्सि एउटा, एउटा माहोल बनाउनुपर्नेछ, यहाँ राम्रो भएको छ भनेर। सरकार ट्याक्टरको स्पिडमा छ। मान्छेको अपेक्षाको गतिअनुसार काम हुन सकेको छैन। गति नै पक्रन सकेन।’
महमन्त्री थापाले युद्धस्तरमा काम गर्नुपर्ने भएपनि नेतृत्व तहबाट काम हुन नसकेको आरोप समेत लगाए।
