धनवीर पुन, काठमाडौँ ।
राष्ट्रिय जनमोर्चाले “गणतन्त्र र राष्ट्रियताका रक्षा गरौँ, सङ्घीयताको खारेज गरौँ” नाराअन्तर्गत रहेर २०८१ चैत २४ देखि २८ गतेसम्म पाँचदिने राजधानीकेन्द्रित आन्दोलन सम्पन्न गरेको छ । सो आन्दोलनमा देशका विभिन्न जिल्ला एवम् प्रवासबाट समेत गरी हजारभन्दा बढी कार्यकर्ताको उपस्थिति थियो ।
त्यही आन्दोलनमा कपिलवस्तुका दुई जना पाका व्यक्तिको उपस्थित हुनुहुन्थ्यो । उहाँहरू हुनुहुन्थ्यो– कल्लुराम चौधरी र अम्बिका पौडेल ।
कल्लुराम चौधरी उमरले ८१ वर्षका हुनुभयो । उहाँ कपिलवस्तु जिल्लाको जगदीशपुर तालनजिकैको गाउँमा बस्नुहुन्छ । उहाँ कपिलवस्तुबाट राष्ट्रिय जनमोर्चाले आह्वान गरेको पाँचदिने आन्दोलनमा सहभागी हुन काठमाडौँ पुग्नुभयो ।
‘पार्टीमा लागेको करिब चार दशक भइसक्यो’ चौधरी भन्नुहुन्छ– ‘सेना पुलिसले गोली चलाउँछ, मरिन्छ । छोराबुहारीले आन्दोलनमा नजाऊ भनेका थिए तर मैले मानिनँ बरु मरे मरुँला, देशका लागि मरुँला आन्दोलनमा जान्छु भनेर आएको हुँ ।’
उहाँ भन्नुहुन्छ–’आफ्ना लागि धेरै बाँचिसकेको छु । आफ्ना सन्तान र नेपालीजनले बिसाउनै नसकिने भारी बोकाउने सङ्घीयता विरुद्धमा आफूले पनि सक्दो आवाज उठाउन आएको हुँ ।’
अम्बिका पौडेल उमेरले ७३ वर्षकी भइसक्नुभयो । बाबुको मुख देख्नसमेत नपाएका छोरा हुर्काउँदै गर्दा २४ वर्षको उमेरमा पार्टीमा आबद्ध भएकी उहाँले कैयौँ आन्दोलन, पञ्चायतकालको सास्ती, माओवादीको कथित ध्वंस, २०४४ साल र २०६३ सालमा भएका आन्दोलनलाई प्रत्यक्ष रूपमा खेप्नु र देख्नुभएको छ ।
उहाँ पनि कपिलवस्तुबाट राष्ट्रिय जनमोर्चाले आह्वान गरेको पाँचदिने आन्दोलनमा सहभागी हुन काठमाडौँ पुग्नुभयो । पार्टीले आह्वान गर्ने जुनसुकै आन्दोलनमा प्रत्यक्ष सहभागी हुँदै र सक्रियतापूर्वक भूमिका निर्वाह गरेको उहाँ बताउनु हुन्छ ।
‘अहिलेको आन्दोलनमा हजुर यो उमेरमा किन सहभागी हुनुभयो भन्ने जिज्ञासाको उत्तर उहाँले यसरी दिनुभयो– ‘नेपाल र नेपालीका लागि सङ्घीयता अफाप सिद्ध भइसक्यो । यो व्यवस्थाले नेपाललाई कङ्गाल बनाउने निश्चित भइसक्यो । यसले नेपाली जनतालाई ऋणको भारी बोकाएको छ । यसको खारेजी आम नेपाली जनको जिम्मेवारी भएको छ ।’
पौडेलको थप भनाइ थियो– यो आन्दोलनले सिङ्गो देशमा सङ्घीयता अनावश्यक भएको सन्देश पुऱ्याएको छ ।’
