काठमाडौँ । नेकपा (मसाल) का महामन्त्री मोहनविक्रम सिंहले गोली, तोडफोड र आगजनीको पर्वाह नगरी सङ्घीयता खारेजीका लागि राजधानीकेन्द्रित आन्दोलनमा आउनुहुने सबैलाई धन्यवाद ज्ञापन गर्नुभएको छ ।
राष्ट्रिय जनमोर्चाद्वारा आयोजित पाँचदिने काठमाडौँकेन्द्रित आन्दोलनको अन्तिम दिन २०८१ चैत २८ गते बिहीबार बुढानीलकण्ठको साप्रेढुङ्गामा प्रशिक्षण दिँदै उहाँले धन्यवाद दिनुभएको हो ।
‘चैत १५ गते नेपालको इतिहासमा कालो दिन हो’ उहाँले भन्नुभयो– ‘त्यो दिन गोली चलेको थियो; तोडफोड भएको थियो; आगजनी भएको थियो र दुई जनाको ज्यान गएको थियो । फेरि पनि ती सबैको पर्वाह नगरी सङ्घीयता खारेजीका लागि राजधानीकेन्द्रित आन्दोलनमा आउनुहुने सबैप्रति धन्यवाद ज्ञापन गर्दछु ।’
उहाँले राजमो कार्यकर्ताहरू स्पातजस्तै खारिएको संश्लेषण अगाडि सार्नुभयो ।
‘तपाईंहरू स्पातजस्तै खारिनुभएको छ । तपाईंहरूको वैचारिक स्तर धेरै माथि पुगेको छ’ उहाँले भन्नुभयो ।
गत कालमा गणतन्त्र स्थापनाका लागि सयौँ वर्ष लड्नुपरेको स्मरण गर्दै उहाँले अहिले फेरि गणतन्त्रको पक्षमा तथा प्रतिगमनको विरुद्धमा लड्नु आवश्यक रहेको भनाइ उहाँको थियो ।
यस खालको लडाइँमा राजमोका नेताकार्यकर्ता आगोको झिल्को हुन सक्ने उहाँको दाबी थियो ।
‘एउटा झिल्कोले जङ्गलमा डढेलो लगाउन सक्छ । जङ्गलका घाँसपात, ढुङ्गा, रुखमा आगो लुकेको हुन्छ’ महामन्त्री सिंहले भन्नुभयो– ‘हाम्रा कार्यकर्ता आगोका झिल्काजस्तै साबित भएका छन् ।’
देशको राजनीतिमा सबै राजनीतिक पार्टीहरू खराब छन् भन्ने भाष्य निर्माण हुँदै गएको प्रसङ्गमा उहाँले त्यसको प्रतिवाद गर्नुभयो ।
उहाँले भन्नुभयो–’देशको राजनीतिमा सबै राजनीतिक पार्टी उस्तै छैनन् । राम्रा पनि छन् । नराम्रा पनि छन् । नेकपा (मसाल) र राष्ट्रिय जनमोर्चा राम्रा पार्टी हुन् ।’
उहाँले राजमो सरकारमा सामेल भएको वा दशकौँदेखि संसद् र स्थानीय निकायमा रहेको तर त्यसका कुनै पनि जनप्रतिनिधि भ्रष्टाचार र अनियमिततामा नमुछिएको उदाहरण यस सन्दर्भमा प्रस्तुत गर्नुभयो ।
पछिल्लो समयमा प्रतिगामी चलखेल बढ्दै गएको बताउँदै उहाँले त्यसका विरुद्ध सजगता र सङ्घर्ष आवश्यक रहेको उहाँको धारणा थियो ।
यस सन्दर्भमा वर्तमान गणतन्त्र बुर्जुवा गणतन्त्र भएकाले समाप्त भए पनि फरक पर्दैन भन्ने सोचाइ वामपन्थी सङ्कीर्णतावादी भएको र यस्तो सोचाइले प्रतिगमनको सेवा गर्ने उहाँको विश्लेषण थियो ।
उहाँले भन्नुभयो– ‘प्रतिगामीले गणतन्त्र विरुद्ध धम्की दिइरहेका छन् । गणतन्त्र पक्षधरले यसको सामना गर्नुपर्दछ ।’
