काठमाडौँ । राष्ट्रिय जनमोर्चाले सञ्चालन गरेको संघीयताविरुद्धको आन्दोलन अन्तर्गत सभास्थलमा कार्यकर्ताहरूले आफैँ सफाई गर्ने गरेका छन्।
अन्य दल तथा संघसंस्थाहरूको तुलनामा राष्ट्रिय जनमोर्चाको सभास्थल सफा सुग्घर हुने गरेको छ ।
बिहीबार पनि राजधानीको भृकुटीमण्डपमा आयोजित जनसभापछि स्वयम्सेवकहरूले पानीका बोतल, कागजका टुक्रा तथा प्लास्टिकरू संकलन गरी सभास्थललाई सफा बनाए ।
सो क्रममा सफाई कार्यक्रमा जुटेका युवा कुलेन्द्र छन्त्यालले सरसफाई गर्नु आफ्नो कर्तव्य भएको बताउनुभयो ।
‘सरसफाई गर्नु हाम्रो कर्तव्य हो । हामी दैनिक यसरी नै सफाई गर्छौं’ कुलेन्द्रले भन्नुभयो, ‘राष्ट्रिय जनमोर्चा अन्य पार्टी र संग संगठनभन्दा यसकारण पनि भिन्न छ । हामी अनुशासनको कडा पालना गर्छौं ।
राष्ट्रिय जनमोर्चाले सञ्चालन गरेको संघीयताविरुद्ध राजधानी केन्द्रित आन्दोलनको आज चौथो दिन (चैत २७ गते) भृकुटीमण्डपमा जनसभा गरेको हो।
त्यसअघि गौशालाबाट भृकुटीमण्डपसम्म जुलुश प्रदर्शन भएको थियो।
सभालाई राजमो प्रवक्ता समेत रहेकी उपाध्यक्ष दुर्गा पौडेल, अखिल नेपाल किसान महासंघ (अप्फा) का अध्यक्ष भैरवराज रेग्मी, अखिल नेपाल कानुन व्यवसायी संघका अध्यक्ष अधिवक्ता पदम रोका, मूल प्रवाह अखिल भारत नेपाली एकता समाजका अध्यक्ष ठाकुर खनाल, अखिल नेपाल महिला संघका अध्यक्ष मीना पुनलगायत नेताहरूले सम्बोधन गर्नुभएको थियो ।
कार्यकारी अध्यक्ष रश्मीराज नेपालीको अध्यक्षतामा भएको कार्यक्रमको सञ्चालन राजमो केन्द्रीय सदस्य वाशुदेव पोखरेलले गर्नुभएको थियो ।
राजमोले चैत २४ गतेदेखि काठमाडौँमा संघीयताको खारेजी, राष्ट्रियता र गणतन्त्रको रक्षाका लागि आन्दोलन गरिरहेको छ ।
सो क्रममा पहिलो दिन शान्तिवाटिकामा जनसभा भएको थियो भने दोस्रो दिन चाबहिल र तेस्रो दिन (चैत २६ गते)माइतीघर मण्डलामा जनसभा गरेको थियो।
कार्यक्रमप्रति जर्मन एमएलपीडीलगायत विदेशी भाइचारा पार्टीका प्रतिनिधिले समेत ऐक्यवद्धता जाहेर गरेका छन् ।
राजमोले चैत २४ देखि ३० सम्म साताव्यापी आन्दोलन घोषणा गरेको भएपनि काठमाडौँमा बढ्दो प्रदूषणका कारण दुई दिन छोट्याएर चैत २८ गते समापन गर्ने तयारी गरेको छ।
शान्तिवाटिकामा हुने समापन समारोहलाई अध्यक्ष चित्रबहादुर केसी लगायत नेताहरूले सम्बोधन गर्ने कार्यक्रम रहेको राजमो केन्द्रीय कार्यालयले जनाएको छ।
