काठमाडौँ । राष्ट्रिय जनमोर्चाका अध्यक्ष चित्रबहादुर केसीले सङ्घीयताको प्रसङ्गमा सेतो हात्ती पाल्न नहुने, यदि त्यसो गरिएमा देश नै समाप्त हुने बताउनुभएको छ ।
राजमो केन्द्रीय कार्यालयद्वारा सङ्घीयता खारेजीका लागि काठमाडौँकेन्द्रित आन्दोलनको दैनिक कार्यतालिका सार्वजनिक गर्दै २०८१ चैत २२ गते शुक्रबार हार्दिक होटलमा आयोजित पत्रकार सम्मेलनमा अध्यक्ष केसीले सो अभिव्यक्ति दिनुभएको हो ।
सङ्घीयताका लागि प्रत्येक वर्ष तीन अर्व बढी रकम खर्च भइरहेको बताउँदै अध्यक्ष केसीले भन्नुभयो–‘सङ्घीयतारूपी सेतो हात्ती नपालौँ, यदि त्यस्तो गर्न थालियो भने त्यसले देशलाई नै खारेज गर्ने छ ।’
अध्यक्ष केसीले नेपालको आर्थिक अवस्था अत्यन्तै कमजोर रहेको बताउँदै सङ्घीयता अनुपयुक्त प्रणाली भएको दावी गर्नुभयो ।
खेतको आलीमा रूख नभएको भए चरा बस्ने थिएन, चरा नभएको भए धान खाने थिएन, धान रहेको भए अनिकाल हुने थिएन’ उहाँले नेपालको कमजोर आर्थिक समस्या अझै बल्झिदो अवस्थामा रहेको बताउनुभयो ।
पत्रकारमाझ जिज्ञासाको उत्तर दिँदै उहाँ सङ्घीयता लागु हुन थालेपछि ३५ लाखभन्दा बढी विदेशिएको र बहुराष्ट्रिय कम्पनीबाट अन्न ल्याएर खानुपर्ने अवस्था रहेको बताउनुभयो ।
नेपालमा सङ्घीयता लागु गर्नुका पछाडि दुईओटा कारण रहेको अध्यक्ष केसीको भनाइ थियो ।
‘एकातिर, हिमालबाट, पहाडबाट तराई टुक्राउनको लागि र अर्काेतिर, देशमा जातीय सद्भाव भड्काउनका लागि सङ्घीयता ल्याइएको हो’ उहाँको भनाई थियो ।
यतिखेर खुलेआम सङ्घीयता ठिक छ भन्ने अवस्थामा कोही नरहेको बताउँदै उहाँले भन्नुभयो– यतिखेर सङ्घीयताका विरुद्ध देशव्यापी जनमत कायम भएको छ ।
आगामी चैत्र २४ देखि ३० गतेसम्म सङ्घीयता खारेजीका लागि काठमाडौँ केन्द्रित आन्दोलनको तालिका सार्वजनिक गर्नुका साथै उहाँले पत्रकार साथीहरूलाई यो विषयमा कलम चलाउने आग्रह गर्नुभयो ।
स्वेच्छाले नभएर सत्तापक्षले समेत करबलले सङ्घीयता बोकिएको बताउँदै यो प्रणालीलाई धक्का दिनका लागि राष्ट्रिय जनमोर्चाले काठमाडौँ केन्द्रित आन्दोलन आयोजना गरेको स्पष्टाक्ति उहाँको थियो ।
