काठमाडौं । समाचार सङ्कलनकै क्रममा पत्रकारको हत्या भएको र आमसञ्चार माध्यममा आक्रमण गरिएको विरोधमा प्रगतिशील पत्रकार सङ्घसहितका पत्रकार सङ्गठनका पत्रकार आन्दोलित भएका छन् ।
२०८१ चैत १६ गते शनिबार नेपाल पत्रकार महासङ्घको आयोजनामा माइतीघर मण्डलामा पत्रकारहरूले प्रदर्शन गरेका हुन् ।
चैत १५ गते शुक्रबार भएको राजावादीहरूको आन्दोलनमा एभिन्युज टेलिभिजनमा कार्यरत पत्रकार सुरेश रजकको मृत्यु भएको थियो ।
रजकले भिडियो खिचिरहेको घरमा राजावादी प्रदर्शनकारीले आगो लगाएका थिए । उनको त्यही जलेर मृत्यु भएको थियो ।
पत्रकार महासङ्घको स्थापना दिवससमेत हो तर यही समयमा पत्रकार र मिडियामाथि आक्रमण भएपछि महासङ्घले पूर्वनिर्धारित कार्यक्रम स्थगित गरेर विरोध प्रदर्शन गरेको हो ।
कार्यक्रमका प्रगतिशीलका महासचिव प्रकाश थापामगर, प्रगतिशीलका केन्द्रीय सदस्य तथा बागमती प्रदेश अध्यक्ष रमेश पौडेल, प्रगतिशीलका केन्द्रीय सदस्य तथा पत्रकार महासङ्घ उपत्यका प्रदेश सदस्य बैरागी जेठा, प्रगतिशीलका केन्द्रीय सदस्य तथा काठमाडौँ अध्यक्ष रोसन दानी, प्रगतिशीलका बागमती प्रदेश सचिव लक्ष्मणदेव पाण्डे, प्रगतिशीलका प्रदेश सदस्य तथा पत्रकार महासङ्घ काठमाडौँका सदस्य गोविन्दकुमार शर्मा, प्रगतिशील काठमाडौँका सचिव तथा पत्रकार महासङ्घ काठमाडौँका सदस्य लक्ष्मण बेल्बासे, अखिल नेपाल युवक सङ्घका अध्यक्ष गणेश अधिकारी, सचिव कमल पौडेललगायतको उपस्थिति रहेको थियो ।
