काठमाडौँ । गृहमन्त्रालयले राजावादी आन्दोलन विशुद्ध हिंसा, अमानवीय र लुटपाटको लागि गरिएको आन्दोलन भएको आरोप लगाएको छ ।
२०८१ चैत १५ गते शुक्रबार साँझ गृहमन्त्रालयमा पत्रकार सम्मेलनमा गृहमन्त्रालयका सहसचिव छवि रिजालले आजको आन्दोलन राजनीतिक उद्देश्यबाट नरहेको कारण अगामी दिनमा सरकार संयमित भएर नबस्ने बताए ।
उनले राजावादीको हिंसात्मक आन्दोलनका क्रममा भएको क्षतिको जिम्मेवार व्यवसायी दुर्गा प्रसाईं रहेको बताए । आन्दोलनको नेतृत्व लिएको कारण घटनाप्रति प्रसाईं जिम्मेवार हुनुपर्ने उनको भनाइ छ ।
उनले हिंसात्मक र लुटपाटको कार्यमा संलग्न जोसुकै भए पनि कानुनी दायरामा ल्याइने बताए । उनका अनुसार राजावादीको तीनकुने आन्दोलनमा झडप हुँदा १५ जना सुरक्षाकर्मीसहति ३० जना घाइते भएका छन् । त्यस्तै, दुई जनाको मृत्यु भएको छ ।
भौतिक क्षतिको पूर्ण विवरण आइनसकेको र सङ्कलनको कार्य भइरहेको समेत उनले बताए ।
उनले भने– ‘अहिलेसम्म हामीलाई प्राप्त विवरणअनुसार १५ जना सुरक्षाकर्मी घाइते हुनु भएको छ । प्रदर्शनकारीको तर्फबाट समेत १५ जना घाइते हुनु भएको छ । भौतिक क्षतिको पूर्ण विवरण आइसकेको छैन । तीनकुने क्षेत्रमा धेरै व्यक्तिको घरमा ढुङ्गामुडा भएको छ । केही सरकारी सवारी साधनमा समेत आगजनी भएको छ । जडिबुटिमा रहेको जडिबुटी प्रशोधन केन्द्रको कम्पनीमा पनि आगजनी भएको छ । यो एकदमै अमर्यादित र अमानवीय कार्य हो । यस्तै भएको अवस्थामा सरकार आगामी दिनमा संयमित भएर बस्दैन ।’
व्यक्तिका निजी सम्पत्ति, अस्पताल, सञ्चारगृह, राजनीतिक दलका कार्यालय, व्यापारिक केन्द्रलगायत यातायातका साधनमाथि भएको तोडफोड र आगजनीका अमानवीय एवम् अमर्यादित घटना गैरकानुनी तथा घोर भर्त्सनायोग्य गर्दै मन्त्रालयले हिंसात्मक एवम् आपराधिक घटना गर्ने/गराउने कार्यका लागि प्रदर्शनका आयोजक नै पूर्ण रूपमा जिम्मेवार रहेको जनाएको छ ।
