काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभाका सांसद राजेश विश्वकर्मा (तुलप्रसाद) ले प्रधानमन्त्री केपी शर्मा ओली संसद्प्रति उत्तरदायी नभएको आरोप लगाउनुभएको छ ।
२०८१ चैत १५ गते राष्ट्रियसभाको सत्रौँ अधिवेशनअन्तर्गत बैठक सङ्ख्या १९ मा मन्तव्य राख्दै उहाँले सो आरोप लगाउनुभएको हो ।
‘हामीले प्रधानमन्त्रीसँग जवाफ मागेका थियौँ’ उहाँले भन्नुभयो–’तर सम्माननीय प्रधानमन्त्रीज्यू संसद्प्रति उत्तरदायी नभएको अनुभूति भइरहेको छ ।’
उहाँले संविधानमा नै प्रधानमन्त्री र मन्त्रीहरू संसद्प्रति उत्तरदायी हुनुपर्ने व्यवस्था रहेको संसद्लाई स्मरण गराउनुभयो ।
‘हामीले कुलमानको विषयलाई उठाएका छौँ’ सांसद राजेशले भन्नुभयो– ‘कुलमानको विषय कुनै व्यक्तिको होइन, सुशासन र कुशासनबिचको विषय हो ।’
उहाँले राष्ट्रियसभामा प्रतिपक्षले अध्यादेश प्रतिस्थापन विधेयकमा उठाएका विषय पनि सम्बोधन नभएको बताउनुभयो ।
प्रतिपक्षले कुनै विषय उठाउन गरेर संसद्मा विरोध गर्दा गरेको विषयलाई गम्भीर रूपमा नलिइएको उहाँले दाबी गर्नुभयो ।
‘विपक्षी दलले कुनै विषयप्रति असहमति जनाएर उभिँदा संसद् स्थगित गर्ने परम्परालाई पनि यहाँ पालना गरिएको छैन’ उहाँले भन्नुभयो– ‘प्रतिपक्षीको विरोधका बाबजुद संसद् चलिरहेको छ ।’
सांसद राजेशले भन्नुभयो–’प्रधानमन्त्रीले हाम्रो प्रश्नको उत्तर नदिँदासम्म संसद् स्थगत गरियोस् ।’
उहाँको मन्तव्यपछि अध्यक्ष नारायणप्रसाद दाहालले पटक पटक बस्न आग्रह गर्नुभएको थियो । त्यसपछि पनि प्रतिपक्ष सांसदहरू आआफ्नो स्थानमा नबसेपछि राष्ट्रियसभा स्थगित भएको थियो ।
