काठमाडौँ । राष्ट्रिय जनमोर्चाका सांसद राजेश विश्वकर्मा (तुलप्रसाद) ले सरकारले संसद्को क्षेत्राधिकार कुण्ठित गरेको आरोप लगाउनुभएको छ ।
२०८१ चैत १० गते राष्ट्रियसभाको सत्रौँ अधिवेशनअन्तर्गत बैठक सङ्ख्या १६ मा प्रस्तुत “सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक–२०८१ माथि विचार गरियोस्” भन्ने प्रस्तावबारे लिखित मन्तव्य राख्दै उहाँले सो आरोप लगाउनुभएको हो ।
माघ ७ गते संसद् अधिवेशन आह्वान गर्नुभन्दा सात दिनअघि पुस २९ गते भूमि अध्यादेश जारी गरेकोमा उहाँले आपत्ति प्रकट गर्नुभयो ।
“जम्माजम्मी ७ दिनको अवधिमा सरकार वा मुलुकलाई त्यस्तो कुन सङ्कट आइपऱ्यो र सरकारले अध्यादेश जारी गर्नुपऱ्यो ?” लिखित मन्तव्य प्रस्तुत गर्दै उहाँले भन्नुभयो– “त्यसको औचित्यता सरकारले पुष्टि गर्न सक्नुपर्दछ ।”
प्रतिस्थापन विधेयकलाई स्वीकार गर्नुको अर्थ संसद्को क्षेत्राधिकारलाई कुण्ठित गर्नु हुने निष्कर्ष दिइएको सो मन्तव्यको पूर्ण पाठ यस्तो छ :
१. सुशासन प्रबन्धन तथा सार्वजनिक सेवा प्रवाहसम्बन्धी केही ऐनलाई संशोधन गर्न बनेको प्रतिस्थापन विधेयकको मूल स्रोत जनप्रतिनिधि संस्था नभएर अध्यादेश हो । जनप्रतिनिधिको कानुन निर्माण गर्ने क्षेत्राधिकारलाई अतिक्रमण वा सङ्कुचित गर्ने उद्देश्यद्वारा अध्यादेश ल्याएको हुनाले त्यसबाट सृजित प्रतिस्थापन विधेयकउपरको सैद्धान्तिक छलफललाई अस्वीकार गरेर जानुपर्ने कुरामा हाम्रो दलले जोड दिन्छ ।
२. सरकारले पुस २९ गते ५ ओटा अध्यादेश जारी गरेको थियो यद्यपि भूमिसम्बन्धी अध्यादेश माघ २ गते मात्र जारी भएको थियो ।
सरकारले माघ १५ गतेका लागि माघ ७ गते अधिवेशन आह्वान गरेको थियो । जम्माजम्मी ७ दिनको अवधिमा सरकार वा मुलुकलाई त्यस्तो कुन सङ्कट आइपऱ्यो र सरकारले अध्यादेश जारी गर्नुपऱ्यो ? त्यसको औचित्यता सरकारले पुष्टि गर्न सक्नुपर्दछ तर सरकारले अध्यादेश जारी गर्नुको आवश्यकता र औचित्यलाई तार्किक ढङ्गबाट पुष्टि गर्न सक्ने अवस्था नै छैन र सकिरहेको पनि छैन । यसको स्वाभाविक तार्किक निष्कर्ष निस्किन्छ कि सरकारले जनप्रतिनिधिको संस्था संसद्लाई छलेर शासन गर्ने उद्देश्यले काम गरेको थियो ।
३. प्रतिस्थापन विधेयकउपरको सैद्धान्तिक छलफललाई स्वीकार गर्नुको अर्थ हुन्छ : जनप्रतिनिधि संस्था संसद्को क्षेत्राधिकारलाई कुण्ठित गर्न सरकारलाई प्रोत्साहित गर्नु । त्यसैले प्रतिस्थापन विधेयकउपरको छलफललाई यो राष्ट्रियसभाले अस्वीकार गरेर जानुपर्ने मत राख्दछ ।
