काठमाडौँ । राष्ट्रिय जनमोर्चाले अछुतको नाममा कसैको बासस्थान नै खतम गर्नु संविधानमा लिपिबद्ध मौलिक हकको विरुद्ध रहेको किटानी गरेको छ ।
अछुतको नाममा सिराहा जिल्लाको औरही गाउँपालिका–५ का दीपक मरिकको बासस्थान भत्काइएपछि राजमोको सो प्रतिक्रिया आएको हो ।
अध्यक्ष चित्रबहादुर केसीको हस्ताक्षरमा २०८१ चैत १० गते आइतबार प्रेसवक्तव्य जारी गर्दै राजमोले आफ्नो धारणा स्पष्ट गरेको छ ।
वक्तव्यमा सो घटनाको भर्त्सना गर्दै ऐनकानुनको प्रभावकारी कार्यान्वयन गर्नमा जोड दिइएको छ ।
यस्तो छ, प्रेसवक्तव्यको पूर्ण पाठ :
“सिराहा जिल्लाको औरही गाउँपालिका–५ मा दीपक मरिकको निजी घर भत्काउनुका साथै उक्त घरले चर्चेको माटोसमेत खुर्केर महायज्ञको आयोजना गरेको घटनाप्रति हाम्रो दल राष्ट्रिय जनमोर्चाको गम्भीर ध्यानाकर्षण भएको छ ।
दीपक मरिक एउटा दलित परिवार भएको र दलित परिवारको घर र निजले छोएको माटोसमेत महायज्ञ गर्दा अशुद्ध वा छोइन्छ भन्ने अन्धविश्वासको आधारमा निजको घर भत्काएकोमा उक्त दलित परिवारमाथि भएको मध्ययुगीन र बर्बर अत्याचारको राष्ट्रिय जनमोर्चाले घोर विरोध तथा भर्त्सना गर्दछ ।
नेपालले जातीय छुवाछुतमुक्त नेपाल भनेर घोषणा गरेको १८ वर्ष पुगिसक्दा पनि एउटा दलित परिवारमाथि धर्मको नाममा भएको मानवता विरोधी हर्कतले अझै पनि नेपाल मध्ययुगीन सामन्ती चरणमा रहेको देखाउँछ । मुलुकमा राजतन्त्रको अन्त्य भए पनि सामन्ती सामाजिक व्यवस्था कायम रहेको हुनाले पुँजीवादी अधिकारको कार्यान्वयनमा समेत बाधा पुगेको यो घटनाले स्पष्ट गर्दछ । यो घटना आफैमा सामाजिक सद्भावमाथिको कलङ्क हो ।
उक्त घटनाको आवश्यक छानबिन गरी संलग्न सबै दोषीलाई कडा कारबाही गर्नका लागि हामीले सरकारसित माग गर्दै घर भत्काइएपछि बासस्थानविहीन बन्न गएको उक्त परिवारलाई आवश्यक क्षतिपूर्तिसहित सोही स्थानमा तुरुन्त बसोबासको व्यवस्था मिलाउनका लागि पनि हामीले सरकारको ध्यान आकर्षित गर्दछौँ । बासस्थानको सुरक्षा गर्नु राज्यको दायित्व तथा प्रत्येक नागरिकको मौलिक हक हो । कथित अछुतको निहुँमा कसैको बासस्थान नै खतम गर्नु सोझै संविधानमा भएका मौलिक हकका विरुद्ध हो । आगामी दिनमा त्यस प्रकारका संविधान तथा मानवता विरोधी घटना हुन नदिन सरकारले समयमा नै ध्यान पुऱ्याउनुपर्दछ र त्यसका लागि जातीय भेदभाव विरुद्धका ऐनकानुनलाई प्रभावकारी प्रकारले कार्यान्वयन गर्नुपर्ने आवश्यकतामाथि हाम्रो पार्टीले सरकारको ध्यान गम्भीर रूपमा आकर्षित गर्दछ ।”
