गोविन्दकुमार शर्मा, धुलिखेल ।
सिन्धुपाल्चोकको खाडीचौरमा सङ्घीयता विरोधी सभा सम्पन्न भएको छ ।
राष्ट्रिय जनमोर्चा बागमती प्रदेश समितिको आयोजनामा २०८१ चैत ८ गते शुक्रबार सो कार्यक्रम सम्पन्न भएको हो ।
सभालाई सम्बोधन गर्दै अखिल नेपाल महिला सङ्घकी अध्यक्ष मीना पुनले सङ्घीयतालाई अब कायम राख्न नसकिने बताउनुभयो ।
सङ्घीयताले गर्दा देशमा चौतर्फी सङ्कट बढ्दै गएको बताउँदै उहाँले यो प्रणालीलाई खारेज नगरे मुलुकको अस्तित्व नै खतरामा पर्ने बताउनुभयो ।
‘सङ्घीयताले आर्थिक रूपमा देशलाई झन्पछि झन् कमजोर बनाउँदै लगेको छ’ उहाँले भन्नुभयो– ‘त्यसका साथै सङ्घीयता सामाजिक सद्भावमाथि पनि खलल पुऱ्याउँदै आएको छ ।’
उहाँले सङ्घीयता जति लामो समय रहन्छ, त्यति बेलासम्म देश नै नरहने अवस्था आइपर्ने धारणा व्यक्त गर्नुभयो ।
सङ्घीयताको यस खालको दुष्परिणामबारे सजग भएर नै राष्ट्रिय जनमोर्चाले यसलाई खारेज गर्न चैत २४ देखि ३० गतेसम्म काठमाडौँकेन्द्रित आन्दोलन सञ्चालन गरेको उहाँले जानकारी दिनुभयो ।
सम्पूर्ण देशभक्त नेपालीलार्ई सो आन्दोलनमा सहभागी हुन अध्यक्ष पुनले आग्रह गर्नुभयो ।
कार्यक्रममा राजमो सिन्धुपाल्चोकका अध्यक्ष दीर्घबहादुर सुवेदीले पनि सम्बोधन गर्नुभएको थियो ।
कार्यक्रमको सञ्चालन राजमो नेता जगत् श्रेष्ठले गर्नुभएको थियो ।
