कल्पना पौडेल ‘जिज्ञासु’ ##

तिमी पनि मानव
म पनि मानव
छुतअछुतको कठबार
जातको प्रश्न र विभेदको उत्तर
जातीय विभाजक रेखाले विभक्त
परम्पराको खोलभित्र
अपारदर्शी काँडेतारले कोतर्दै गर्दा
प्रेमको अनुभूति गर्दै
खुसीका लालीमा छर्न किन सकिँदैन ?
मान्छेले मान्छेबिच अँगालोमा
कस्न किन सकिँदैन ?

दुई हात जोडेर
शिष्टाचार पस्किनका लागि
हैसियत र प्रतिष्ठाको भाँजो हालेर
वर्ग र जातको कुरुप करौँतीले
सामाजिक जुइनो चुडाल्दा,
म प्रश्न गर्छु साथी
हाम्रो जात फरक फरक किन ?
हाम्रो वर्ग फरक किन ?
दलितको लाहाछाप
गरिबको उपनाम
तिरस्कारको खन्जर
किन ? किन ? किन ?

इमान र जमान
अनि नैतिकताले कङ्गाल
तिनै मान्छेहरू
कथित उच्च र निम्न जातकै कारणले
हीन विचारको जस्केलाबाट
प्रतिष्ठाको रवाफ डकारिरहेका छन्
किन ? किन ? किन ?

सिङ्गो जगतको
घाम उही हो—जून उही हो
धर्ती उही हो—नुन उही हो
आत्मा उही हो—खुन उही हो
नियम उही हो—कानुन उही हो
तर मान्छे मान्छे बिचमा
यति धेरै फरक किन ?

भावना र आत्मा
हैसियत र आचरण
मूल्य र मान्यता
मर्यादा र प्रतिष्ठा
आचरण विचरण
इमान र जमान
नीति र नैतिकता
सबै सबै फरक किन ?

एकै धर्तीका मान्छे मान्छे
फरक किन ?
के कारण फरक ?
कसरी फरक ?
कसले दिन्छ यसको जवाफ ?
मानव सभ्यताको युगले मागिरहेको छ
कसले दिन्छ यसको जवाफ ?