काठमाडौँ । सरकारले चैत २४ गते सरकारी कार्यालय तथा सार्वजनिक निकायमा सार्वजनिक बिदा दिने निर्णय गरेको छ ।

२०८१ चैत ४ गते बसेको मन्त्रिपरिषद्को बैठकले चैत २४ गते सरकारी कार्यालय तथा सार्वजनिक निकायमा सार्वजनिक विदा दिने निर्णय गरेको हो ।

यस्ता छन् सरकारका निर्णय

• नेपालको संविधानको धारा ५३ एवम् सुशासन (व्यवस्थापन तथा सञ्चालन) ऐन–२०६४ को दफा ४१ बमोजिम नेपाल सरकारको आर्थिक वर्ष २०८०/८१ को वार्षिक प्रतिवेदन सम्माननीय राष्ट्रपतिसमक्ष पेस गर्ने ।
• विश्व बैङ्कमार्फत विद्यालय क्षेत्र सुधार कार्यक्रमको लागि प्राप्त हुने अनुदान सहायता प्राप्त गर्ने सम्बन्धमा वार्ता गर्न अर्थमन्त्रालयका सहसचिवको नेतृत्वमा वार्ता टोली गठन गर्ने ।
• ऋण असुली न्यायाधीकरणको बैङ्किङ सदस्य पदमा नरेशराज अर्याल (काठमाडौँ) लाई नियुक्त गर्ने ।
• नेपाल प्रहरीको प्रहरी महानिरीक्षक पदमा प्रहरी अतिरिक्त महानिरीक्षका दीपक थापालाई नियुक्त गर्ने ।
• विक्रम संवत् २०८१ चैत २४ गतेका दिन सरकारी कार्यालय तथा सार्वजनिक निकायमा सार्वजनिक विदा दिने ।
• राष्ट्रिय बिपत् जोखिम न्यूनीकरण तथा व्यवस्थापन प्राधिकरणको कार्यकारी प्रमुख पदमा दिनेशप्रसाद भट्ट (बैतडी) लाई नियुक्त गर्ने ।
• २०८१ चैत ४ गतेदेखि ६ गतेसम्म भारतको नयाँदिल्लीमा आयोजना हुने रायसिना डायलगको दशौँ संस्करणमा माननीय परराष्ट्रमन्त्री डा. आरजू राणादेउवालाई सहभागी हुन स्वीकृति प्रदान गर्ने ।
• नेपाल सरकारको नाममा दर्ता रहेको काभ्रेपलाञ्चोक जिल्ला साविक मेथिनकोट गाविस–६ को ६ रोपनी र साविक पोखरी नारायणस्थान गाविस–३ को ६ रोपनी जग्गा क्रमशः प्रहरीचौकी भकुन्डेबेसी र प्रहरीचौकी पोखरी नारायणस्थानको भवन निर्माणका लागि प्रयोग गर्न स्वीकृति दिने ।
• नेपाली सेनातर्फ उपरथी पद एकमा विशेष बढुवा, सहायक रथी पद एकमा बढुवा र सहायक रथी पद एकमा पदावधि थप गर्ने ।
• यदुनाथ पौडेल (अर्घाखाँची) लाई जनक शिक्षा सामग्री केन्द्र लिमिटेडको प्रबन्ध सञ्चालक पदमा नियुक्त गर्न जनक शिक्षा सामग्री केन्द्र लिमिटेडको सञ्चालक समितिलाई निर्देशन दिने ।
• पवित्रा सुवेदी (सुर्खेत) र रामशरण सापकोटा (मकवानपुर) लाई शिक्षक सेवा आयोगको सदस्य पदमा नियुक्ति गर्ने ।