समीर सिंह ##

सम्बन्धको परिभाषा
मेरो अनि तिम्रो
मेरो अनि उनको
हिजो र आज
समयको गतिसँगै
तिमीभित्र म खोजेँ
उनीभित्र पनि म खोजेँ
कठिन रहेछ परिभाषा
बुझ्नै नसकिने जीवनको मान्यता

तिम्रा मिठा शब्दहरू
वाचा र प्रतिज्ञाहरू
खोई कता हराए
अन्धकारसँगै ओझेल भए
उजेलीतिर उक्लने बाटो नै बिराए

परिभाषा खोज्दै जाँदा
जीवनको अर्थ खोज्दै जाँदा
तिमीभित्र म भेटाउनै सकिनँ
स्वार्थ हो कि अहङ्कार
तिमीलाई म चिन्नै सकिनँ
तिमीभन्दा उनी
अलि टाढाकी हुन् कि भन्थेँ
विचारको पनि के नाता भन्थेँ
समयसँग पौडी खेल्दै जाँदा
उनीभित्र म भेट्न थालेँ
विशेष प्रकारको माया भेट्न थालेँ
वर्गीयता भनौँ कि विचारको मिलन
एउटा बेग्लै संसार भेट्न थालेँ

चुनौतीको पहाडतर्फ उकालो लाग्दै जाँदा
सम्बन्धको नयाँ परिभाषा बुझ्न थालेँ