विष्णु शर्मा ##

हजुरहरूका अनुहार देख्दा
खुब चहकिला छन्
हजुरहरूका भाषण सुन्दा
धेरै गहकिला छन्

हजुरहरूका पहिरन देख्दा
अत्यन्तै भव्य छन्
हजुरहरूका बोली सुन्दा
धेरै सभ्य छन्

हजुरहरूका शब्द शब्दमा
दीनदुखीको मुक्ति छ
आफूतिर सम्मोहित पार्ने
राम्रो कला र जुक्ति छ

हजुरहरूका पछाडि देख्दा
अत्यन्तै ठुलो भिड छ
हजुरहरूको शासनमा हेर्नुस
गर्भकालाई पनि ऋण छ

जस्तो बोली छ हजुरहरूको
त्योअनुसार काम गर्नुहुन्न
पैसाको बिटो पाउनुभयो भने
नेपाल बेच्न पछि पर्नुहुन्न

देशमा नमिल्ने गलत प्रणाली
हजुरहरूको सासकले लागु गर्छ
जनताले बच्चाको गाँस काटेर
सडकमा विरोधमा जुट्नुपर्छ

गलत गर्दा झुकाउनु पर्ने शिर
बिदेशी सामु झुकाउनुहुन्छ
स्वदेशी उत्पादनलाई बजार दिनुपर्नेमा
भएको बजार पनि सुकाउनुहुन्छ

देशमा केही गर्छौं भन्नेहरूलाई
देश छोड्न बाध्य बनाउनुहुन्छ।
विदेशीसँग श्रम सम्झौता गर्दा
हर्षले खुशीयाली मनाउनुहुन्छ

शासनसत्तामा भएका हजुरहरूमा
हेपाहासँग जसरी नि लड्नुपर्ने
आफ्नोलाई आफ्नो भन्न सक्ने
अविरल अदम्य साहस हुनुपर्ने

अनुहार, पहिरन, भिड, बोलीमा
कसैको वास्तविकता झल्किदैन
यस्ता अदूरदर्शी शासक हुँदासम्म
देश विकासतिर ढल्किँदैन