काठमाडौँ । अमेरिकाले अवैध रूपमा त्यहाँ गएका नेपालीलाई फर्काउन सुरु गरेको छ ।
बुधबार विहान १० जना नेपाली अमेरिकाको चार्टर विमानमार्फत काठमाडौँ आइपुगेका अध्यागमन विभागले जनाएको छ ।
विभागकाअनुसार अमेरिकी चार्टर विमान बुधबार बिहान नौ बजेर ५३ मिनेट जाँदा त्रिभुवन विमानस्थलमा अवतरण भएको हो।
त्रिभुवन विमानस्थल कार्यालयका प्रवक्ता जनगन्नाथ निरौलाले अमेरिकी वायुसेवा कम्पनी ग्रिफोन एयरको जहाज गल्फजेटस्ट्रिम काठमाडौँमा अवतरण भएको जानकारी दिए।
डोनाल्ड ट्रम्प अमेरिकाको राष्ट्रपतिमा निर्वाचित भएपछि अवैध रुपमा अमेरिका प्रवेश गरेका आप्रवासीलाई अमेरिकी प्रशासनले देश निकाला गरिरहेको छ। ट्रम्पको कार्यकारी आदेशपछि यसअघि नै २७ नेपाली अमेरिकाबाट निकालिएका छन्। ट्रमको दोस्रो कार्यकाल सुरु भएपछि ३७ जना नेपाली अमेरिकाबाट ‘डिपोर्ट’ भएका छन्।
उक्त विमानमा १० नेपालीसँगै केही अल्बानियाका नागरिक पनि आएका अध्यागमन कार्यालयले जनाएको छ। उनीहरुलाई तिराना अन्तर्राष्ट्रिय विमानस्थलमा ओरालेपछि उक्त विमान काठमाडौँ आएको हो।
जनवरीमा ६ जना, फेब्रुअरीमा २० जना र मार्चमा १ नेपाली अमेरिकाबाट निकाला भएका थिए। यस अवधिमा तीन नेपालीलाई पानामा ‘डिपोर्ट’ गरिएको अमेरिकी प्रशासनले जनाएको छ
यसअघिका राष्ट्रपति जो बाइडेनको चारवर्षे कार्यकालमा करिब ९ हजार नेपाली बिनाभिसा अमेरिका प्रवेश गरेको अनुमान छ। तीमध्ये २ हजार ८ जना अहिले अमेरिकी प्रशासनको हिरासतमा छन्।
पहिलो चरणमा अवैध रुपमा अमेरिकामा बस्दै आएका १४ लाख ४५ हजार ५ सय ४९ जना आप्रवासीलाई देश निकाला गर्ने तयारी अमेरिकी प्रशासनले गरेको छ।
