काठमाडौँ । साहित्यकार झमक घिमिरे अस्वस्थ भएकी छन् ।मस्तिष्क रोक (सेरेब्रल पाल्सी) को समस्या झेल्दै आएकी घिमिरेलाई बेला बेला स्वास्थ्यमा समस्या बल्झिने गरेको परिवारले बताएको छ ।

घिमिरेमा स्वास्थ्य समस्या आउन थालेको एक वर्ष पुग्न लाग्यो ।

झमक घिमिरे साहित्यकला प्रतिष्ठान नेपालका अध्यक्ष गोपाल गुरागाईँ पछिल्लो समय घिमिरेको स्वास्थ्यमा निरन्तर समस्या आउँदै गएको बताए ।

‘घिमिरेको शरीरका बायाँ दुई वटा पाउले मात्रै काम गर्छ । अन्य कुनै पनि कुरा चल्दैन । उनका मस्तिष्क तथा विचारहरू चल्छ, दृष्टिमा समस्या अहिलेसम्म छैन । श्रवण र दृश्य शक्ति छ, तर आवाज छैन,’ गुरागाईँले भने ।

उमेर बढ्दै जाँदा मांसपेशीमा बढी असर देखिने गरेको उनको परिवारले बताउने गरेको छ । उनको स्वास्थ्य कमजोर हुँदै गएको छ ।

केही समयअघि काठमाडौँको टिचिङ अस्पतालमा उपचार गरेर फर्किएकी झमकको पछिल्लो एक हप्ताअघि विराटनगरको न्युरो अस्पतालमा फलोअप उपचार भएको छ ।

केही दिन अघि उनकै घरमा भएको एक कार्यक्रममा झमककी आमा आशादेवी घिमिरेले एक पटक फलोअपमा जाँदा ३० हजार खर्च हुने गरेको सुनाएकी थिईन् । गाडीमा ल्याउने र लग्न, चेकजाँच र औषधिको लागि मात्रै त्यति खर्च लाग्छ, उनले भनिन्, हप्ता दिन १५ दिन वा महिना दिनमा एक पटक अनिवार्य फलोअपको लागि लग्नै पर्छ ।

झमककी आमाले भनेकी थिईन्, ‘मैले त जन्मदिएकी छोरी हो, हुर्काएँ बढाएँ तर अब उनी राष्ट्रकी छोरी हुन्। अब राज्यले पनि गर्नु छ ।’
पछिल्लो समय उनको घाँटी र ढाडमा समस्या सहितको दुखाई भएको छ ।

घिमिरेको कृति जीवन काँडा की फूल कृतिले २०६८ सालमा मदन पुरस्कार प्राप्त गरेको थियो ।