विष्णु शर्मा ##

छोराछोरी विदेश पठाएर
देशमा भविष्य छ भन्नेहरू
झुटा भाषणबाजी गरेर
जनताको नेता बन्नेहरू

छोराछोरी ठुला विकसित
देशमा छन् भन्न रुचाउनेहरू
देशमा केही गर्छौं भनेर
सङ्घर्ष गर्नेलाई होच्याउनेहरू

युवायुवती दिनानुदिन विदेश जाँदा
बसेर टुलुटुलु हेर्नेहरू
समानता ल्याउँछौँ भन्छौँ
घरबाहिर र भित्र कुरा फेर्नेहरू

महिला विभेद अन्त गर्छौं भन्छौ
श्रीमतीलाई डिप्रेसनमा पुऱ्याउनेहरू
मेलमिलापको गुड्डी खुब हाक्छौ
आमा र श्रीमतीबिच झगडा पार्नेहरू

देश विकासका कुराहरू गर्छौ
व्यक्तिगत स्वार्थको निम्ति गर्नेहरू
देखावटी देशभिक्तको नाटक गर्छौ
आन्तरिक रूपमा विदेश भर्नेहरू

राज्य पुनसंरचना गर्दा साँगुरो बाटोबाट
छिमेकीको इसारामा सङ्घीयता भित्राउनेहरू
केन्द्र र स्थानीय तहमा तलबभत्ताको नाउँमा
देश र जनताको ढुकुटी रित्याउनेहरू

भाषण त एक कला हो भन्ने नबुझेर
नेताको भाषणमा ताली लगाउनेहरू
एक दिनको मासुभातको भरमा
अर्को पाँच वर्ष आँसु बगाउनेहरू

सचेत हुनैपर्छ तालिमयुक्त भाषणमा
उफ्री उफ्री ताली पिट्नेहरू
अब त सुध्रिनु नै पर्छ होला
जनताको भोटले चुनाव जित्नेहरू

सबै मिली प्रश्न गर्नैपर्छ यिनीहरूलाई
देशमा सुन्दर भविष्य छ भन्नेलाई
देशमा साँच्चै भविष्य छ जनताको भने
हजुरका बालबच्चा देशभित्र खोई ?