जुमानसिंह केसी, प्युठान ।
राष्ट्रिय जनमोर्चा गौमुखी गाउँपालिका समितिको आयोजनामा दुईदिने सैद्धान्तिक तथा राजनैतिक प्रशिक्षण ठूलाबेसीमा सम्पन्न भएको छ।
शुक्रबारदेखि सुरु भएको प्रशिक्षण कार्यक्रममा गौमुखी गाउँपालिकाका सबै वडाका सक्रिय कार्यकर्ताहरुको सहभागिता रहेको पालिका समितिका कार्यवाहक अध्यक्ष वीरबहादुर केसीले बताउनुभयो।
कार्यक्रममा दर्शन शास्त्र (विश्व दृष्टिकोण),देशको समसामयिक राजनीति अवस्था, नौलो जनवाद, समाजवादी र साम्यवादी क्रान्ति, मानव समाजको विकास क्रम, संगठन निर्माण र अनुशासन लगाएत विषयमा प्रशिक्षण गरिएको राष्ट्रिय जनमोर्चा प्युठानका अध्यक्ष ज्ञामुराम न्यौपानेले बताउनुभयो।
ठूलाबेसीमा दुई दिनसम्म सञ्चालन भएको प्रशिक्षण कार्यक्रममा अखिल नेपाल बुद्धिजीवी संघका केन्द्रीय सचिवालय सदस्य तथा राजमो केन्द्रीय प्रशिक्षण विभागका सदस्य दुर्गानाथ खरेल र राजमो लुम्बिनी प्रदेशका सल्लाहकार शुरेस थापाले प्रशिक्षण दिनुभएको नेता भरत बहादुर केसीले जानकारी दिनुभयो।
पार्टी संगठनलाई चुस्तदुस्त राख्न, पार्टीका सक्रिय कर्याकर्ताको क्षमता विकास र संगठनलाई चलायमान तथा गतिशील बनाउन प्रशिक्षणले महत्त्वपूर्ण भूमिका खेलेको र कार्यक्रमले कार्यकर्तामा उत्साह थपेको राष्ट्रिय जनमोर्चा गाउँपालिका सचिव कृष्णप्रसाद जैसीले बताउनुभयो।
प्रशिक्षण कार्यक्रममा महिला र पुरुष गरि ७१ जनाको सहभागिता रहेको राजमो गौमुखीले जनाएको छ।
