ऋतु केसी ##
कमरेड, मुट्ठी उचाल्यौ रे !
अनि त्यो के के जाति लेखेको ब्यानरमा
पुलुक्क हेरेर जिन्दाबाद भन्यौ रे !
हिजोसम्म गलत लागेका कुराप्रति
आज एकाएक, रातारात
सहमति र समर्थनको शिर झुकाउँदै
मुट्ठी उचाल्यौ रे !
अनि जिन्दाबाद पो भन्यौ रे !
मुक्तिको आन्दोलनमा थाक्दै थाक्दिनँ
गलतलाई सही कहिल्यै भन्दै भन्दिनँ
झुकाउन खोज्नेका सामु डग्दै डगदिनँ भनेर
बाचा गरेको कमरेड
सजिलो चौतारी के देखेको थियो
क्रान्ति त अब पूरा भयो भन्दै
मुट्ठी उचाल्यौ रे !
अनि जिन्दाबाद पो भन्यौ रे !
आफ्नो लामो सङ्घर्षको इतिहास
तिमीले पाएको र हिँडेको स्कुलिङ
तिम्रो दृष्टिकोणले छर्लङ्गै गलत देखेको बाटो
ओहो आज फेरि शिर झुकाएर
अलिअलि गन्ध के पाएको थियो
रस र रङको
यही हो अब लक्ष्य भन्दै
मुट्ठी उचाल्यौ रे !
अनि जिन्दाबाद पो भन्यौ रे !
तिम्रा महत्त्वाकाङ्क्षा
अनि उचाइका भ्रम
आन्दोलनमै नदेखिएका होइनन् तर
तिमीले सहीगलत छुट्याउने छौ भनेर
कैयौँपटक नजोखिएका पनि होइनन्
त्यही महत्त्वकाङ्क्षाको सिढी चढ्न
एक पलमा आदर्शलाई बन्दगी राखी
मुट्ठी उचाल्यौ रे !
अनि जिन्दाबाद पो भन्यौ रे !
हिजो जहाँ तिमीले फोहोर मात्र देखेको थियौ
सम्हालिनसक्नुको डङ्गुर भन्ने गर्थ्यौ
राष्ट्रघात, जनघात, भ्रष्टाचार, लुटैलुट भन्थ्यौ
पखाल्न होइन, त्यही डुबुल्की मार्न
टुप्लुक्क त्यही रासमा पुगेछौ
कही कतै कसैकसैलाई त
भ्रममा पनि पार्न सकेछौ
मुट्ठी उचाल्यौ रे !
अनि जिन्दाबाद पो भन्यौ रे !
