शङ्करप्रसाद पोख्रेल, बुटवल ।
मोतिपुर मगर महिला समूह शिवनगर बुटवलको सातौँ साधारणसभा २०८१ फागुन १० गते शनिबार सम्पन्न भएको छ ।
रुपन्देहीको बुटवल–१७ मा क्रियाशील समूहले सो अवसरमा ढाका बुन्ने तालिम र सोरठी गीतको विमोचनसहित सो कार्यक्रम गरेको हो ।
बुटवल उपमनपाकी उपमेयर सावित्रादेवी अर्यालले कार्यक्रमको उद्घाटन गर्नुभएको थियो ।
कार्यक्रममा मोतिपुर मगर महिला समूह शिवनगरकी अध्यक्ष रन्जना सिञ्जाली, महिला मगर सङ्घ लुम्बिनी प्रदेश समितिकी अध्यक्ष केशरी तरामुमगर, रुपन्देही अध्यक्ष निर्मला थापामगर, नेपाल मगर सङ्घ रुपन्देहीका अध्यक्ष थर्कबहादुर बारघरेमगर, बुटवल नगर अध्यक्ष बसन्ती साठीघरेमगर, सल्लाहकार चन्द्रबहादुर घर्तीमगर, सोरठी गुरु तथा कलाकार छवि राजकोटीलगायतले मन्तव्य राख्नुभएको थियो ।
सो अवसरमा बुटवल–१७ का वडाध्यक्ष ज्ञानबहादुर रेश्मी, वडासदस्यहरू देवी डगोरिया र रेखा विक, निवर्तमान वडाअध्यक्ष सन्तबहादुर राना, मगर युवा सङ्घका अध्यक्ष हेमन्त बुढाथोकी मगर, बुटवल देवीनगर चौकी इन्चार्ज टेकराज भण्डारी, दामोदर ज्ञवाली, बिमला तिवारी, खिम तरामुमगर, राधिका गलामी, चिनबहादुर थापालगायतको उपस्थित रहेको थियो ।
समूहकी अध्यक्ष रन्जना सिञ्जालीको अध्यक्षता, सचिव सुनिता राजकोटीको सञ्चालन र उपाध्यक्ष झरना सूर्यवंशीको स्वागतमा सो कार्यक्रम भएको थियो ।
अध्यक्ष सिञ्जालीले प्रस्तुत गरेको वार्षिक प्रगति प्रतिवेदन तथा लीला राजकोटीले प्रस्तुत गरेको कोषाध्यक्षको प्रतिवेदन साधारणसभाले पास गरेको थियो ।
बुटवल उपमनपाले ढाका बुन्ने तालिमका लागि दुई लाख उपलब्ध गराएको छ भने कार्यक्रमका लागि बुटवल उपानपा–१७ को वडा कार्यालयले ५० हजार सहयोग दिएको सचिव राजकोटीले जानकारी गराउनुभयो ।
१५ दिनसम्म चल्ने तालिममा २० जना महिलाको सहभागिता रहने छ । गैरमगर महिलाको पनि सहभागिता रहने उक्त सिपमूलक ढाका बुन्ने तालिम फागुन ११ गतेदेखि मोतिपुर मगर महिला समूह शिवनरको आफ्नै कार्यालयमा सञ्चालन हुनेछ ।
