काठमाडौँ । मुस्लिम धर्मको प्रशिद्ध पर्व मानिने रमजानको अवसर पारेर इसाई मिसनरीले आगामी फागुन १६ देखि चैत १५ गतेसम्म ३० दिने “प्रार्थना” अभियान सञ्चालन गर्दैछन् ।
“परमेश्वरको वचनमा कुनै बन्धन छैन” नाराका साथ सो अभियान सम्पन्न गर्न उनीहरूले “मुस्लिम संसारको लागि ३० दिने प्रार्थना अभियान” समूह नै स्थापना गरेका छन् ।
हुन त इसाई मिसनरीको यो अभियान नयाँ भने होइन । उनीहरूको मध्यपूर्वमा सन् १९९२ मा सम्पन्न अन्तर्राष्ट्रिय सभाले यससम्बन्धी निर्णय गरिसकेको थियो । नेपालमा यो अभियान सन् २००८ देखि चल्दै आएको बताइएको छ ।
यस वर्ष मुस्लिम धर्मावलम्बीले फागुन १६ गतेदेखि चैत ३० गतेसम्म रमजान पर्व मनाइरहेको अवसर पारेर उनीहरूमाझ इसाई धर्मको प्रचारका लागि यो कार्यक्रम आयोजना गरिएको उनीहरूद्वारा प्रकाशित ब्रोसरमा उल्लेख छ ।
ब्रोसरमा रमजानकै अवसर पारेर “प्रार्थना” अभियान चलाउनुका पछाडि दुईओटा कारण रहेको बताइएको छ ।
मुस्लिमहरूले प्रथमतः प्रत्येक वर्षको निश्चित अवधिमा ख्रिस्टियनको परिचय पाउन र सो धर्ममा सहभागी हुन सकुन्, द्वितीय, रमजानको अवधिमा उनीरू धार्मिक चिन्तनले ओतप्रोत हुने भएकाले यो अवधि अभियानका लागि उपयुक्त हुन्छ—ब्रोसरमा भनिएको छ ।
डिमाइ साइजमा आठ पृष्ठको सो ब्रोसरमा नेपालमा इसाई धर्मावलम्बीको जनसङ्ख्या चार देखि १० प्रतिशत रहेको उल्लेख छ ।
ब्रोसरमा फागुन १६ गतेदेखि चैत २६ गतेसम्म प्रत्येक दिनका लागि “प्रार्थना” का दुईओटा बुँदा दिइएको छ । त्यसमध्ये प्रत्येक दिन “प्रार्थना” को दोस्रो बुँदा नेपाली मुस्लिम धर्मावलम्बीसित सम्बन्धित छ ।
छैटौँ दिनको “प्रार्थना” बुँदा अल्बानियासित सम्बन्धित छ । त्यहाँ साम्यवादको अन्त्यसँगै इसाई धर्म अवलम्बन गरिएको उल्लेख छ ।
सो अभियान विश्वभरि सञ्चालन भइरहेको त्यसका लागि ४० भन्दा बढी भाषामा बुकलेट प्रकाशन भएको सो अभियानको वेबसाइटमा उल्लेख छ । अभियानसित सम्बन्धित कुनै सम्पर्कका लागि वेबसाइटमा अमेरिकाको कोलोराडोको ठेगाना दिइएको छ ।
