समीर सिंह ##

‘कमरेड’
मिठो छ शब्द
तर गाह्रो छ प्रयोग गर्न

कमरेड अर्थात् वर्गीय मित्र
सजिलो छ, अनुकूल परिस्थितिमा
तर कठिन छ
साँच्चिकै कमरेड बन्न

म र मेरो स्वार्थ
पद र महत्त्वाकाङ्क्षा
स्वार्थी संसारको रमझम
जब बन्छ प्रमुख विषय
ओझेल हुँदै जान्छ
कमरेडली सम्बन्ध
नारा मात्र बन्छ
वर्गीय सम्बन्ध

सँगै हिँड्ने सँगै लड्ने
त्यसरी बनेको सम्बन्ध
त्यसरी बनेका कमरेडहरू
विचारमाथि विश्वासघात हुँदा
महान् लक्ष्यबाट पलायन हुँदा
भावनामाथि चोट पुऱ्याउँदा
ओझेल हुँदै जान्छ
कमरेडली सम्बन्ध
अनि इतिहासको विषय बन्छन्
हिजोका कमरेडहरू
एकादेशका कथामा सीमित हुन्छन्
हिजोका वर्गीय कमरेडहरू ।