काठमाडौँ । काठमाडौँको ठमेलमा प्रहरीलाई कुटपिट गरेको आरोपमा सत्तारुढ दल नेकपा एमालेको भातृ संगठन अनेरास्ववियुका नेता कमल जोशी पक्राउ परेका छन् ।
चौतर्फी दबाबपछि बिहीबार बानेश्वरबाट प्रहरीले उनलाई पक्राउ गरेको हो ।
माघ २४ गते उनीहरूसहित ५/६ जनाले ठमेलस्थित सडकमै हो हल्ला गर्दै हिँडेपछि प्रहरी वृत्त दरबारमार्गको क्वीक रेस्पोन्स टीम (क्युआरटी) प्रहरीले फेला पारेको थियो । उनीहरूलाई सम्झाइ बुझाइ गर्न खोज्दा प्रहरी टोलीमाथि आक्रमण गरेका थिए । क्युआरटीको मोटरसाइकलसमेत तोडफोड गरेका थिए ।
प्रहरीलाई पिट्ने र मोटरसाइकल तोडफोड गरेको समूह तत्काल भागेको थियो।
सो घटनामा यसअघि ताप्लेजुङको फुङलिङ्ग नगरपालिका १ घर भई हाल काठमाडौँको लैनचौर बस्ने २५ वर्षका दिनेश सिग्देल र डडेलधुराको गन्यापधुरा गाउँपालिका ५ घर भई लैनचौरमै बस्ने २२ वर्षका रमेश फुलारालाई प्रहरी पक्राउ गरेको थियो ।
उनीहरूलाई अभद्र व्यवहारको कसुरमा जिल्ला प्रशासन कार्यालय काठमाडौँबाट म्याद लिएर प्रहरीले अनुसन्धान गरिरहेको छ ।
