महोत्तरी । महोत्तरीमा प्रहरीले चलाएको गाली लागेर १६ वर्षीय एक किशोरको मृत्यु भएको छ । मृतक १६ वर्षीय किशोर लागुऔषध कारोबारी भएको प्रहरीको दाबी छ । उनीमाथि ६ राउण्ड गोली लागेको छ ।
मृत्यु हुनेमा रामगोपालपुर–७ निवासी सुरेन्द्र यादवका छोरा १६ वर्षीय राजन यादव रहेका जिल्ला प्रहरी कार्यालय महोत्तरीले जनाएको छ । प्रहरीले मृतक किशोरका बुवा ५० वर्षीय सुरेन्द्र यादव र सोही ठाउँका २७ वर्षीय राहुल यादवलाई पक्राउ गरेको छ।
प्रहरीले लागु औषध कारोबारीविरुद्ध गरेको कारबाहीका क्रममा किशोरको मृत्यु भएको दाबी गरेको छ । जारी लकडाउनका बेला पनि ठूलो मात्रामा लागुऔषध कारोबार गरेको गोप्य सूचनाका आधारमा जिल्ला प्रहरी कार्यालयबाट खटिगएको सादा पोशाकका प्रहरी र लागुऔषध कारोबारीबीच रामगोपालपुर ७ स्थित सडकमा राति करीब ८ बजेतिर झडप भएको थियो ।
प्रहरी उपरीक्षक श्यामकृष्ण अधिकारीका अनुसार चारैतिरबाट घेरा हाली लागुऔषध कारोबारीले आक्रमण गर्न थालेपछि प्रहरीले आत्मरक्षाका लागि गोली चलाउँदा किशोरको घटनास्थलमै मृत्यु भएको हो ।
घटनास्थलबाट केही मात्रामा लागुऔषध नाइट्रोभेट बरामद गरिएको प्रहरीको भनाई छ । झडपमा प्रहरी हवल्दार सञ्जीव पासवान तथा प्रहरी जवान रामविहारी पासवान, मनोज साह र लालबाबु यादव घाइते भएका छन् । उनीहरुको उपचार जिल्ला अस्पताल जलेश्वरमा भइरहेको छ । रासस
