काठमाडौँ । अखिल नेपाल कानुन व्यवसायी सङ्घ (अन्ला) का अध्यक्ष अधिवक्ता पदम रोकाले सङ्घीयता भकारी रित्याएर नाचगान गर्ने संस्कृति जस्तो भएको धारणा व्यक्त गर्नुभएको छ ।
२०८१ माघ २६ गते शनिबार राष्ट्रिय जनमोर्चा काठमाडौँले तारकेश्वरको गोलढुङ्गामा आयोजित सभालाई सम्बोधन गर्ने क्रममा रोकाले यस्तो अभिव्यक्ति राख्नुभएको थियो ।
‘आन्तरिक खर्च व्यवस्थापन गरेर अरूलाई दान दिन सक्ने अवस्थामा पुगेका देशले मात्र सङ्घीयता धान्न सक्दछ’ उहाँले भन्नुभयो– ‘तपाइँहरूलाई थाहै छ, नेपालको आर्थिक अवस्था त्यस प्रकारको छैन ।’
एउटा अध्ययनले १४ ओटा नेपालको आयले मात्र सङ्घयिता धान्न सकिने देखाएको बताउँदै उहाँले देशको अवस्था आर्थिक रूपमा प्रतिकूल रहेको बताउनुभयो ।
सम्बोधनमा अधिवक्ता रोकाले सङ्घीयता सफल हुनका लागि आर्थिक रूपमा सम्पन्न हुनुपर्ने, विधिको शासन हुनुपर्ने र स्वाधीनता सम्पन्न हुनुपर्ने बताउनुभयो ।
सङ्घीयताले सानो पुँजीवालाहरू बढी प्रभावित भएको बताउँदै उहाँले सङ्घीयता विरोधी आन्दोलनमा उहाँहरूको भूमिका महत्वपूर्ण रहने बताउनुभयो ।
सभामा राजमो महासचिव मनोज भट्ट र अखिल नेपाल जनजाति सम्मेलनका अध्यक्ष निमबहादुर बुढाथोकीले पनि मन्तव्य राख्नुभएको थियो ।
कार्यक्रममा अखिल नेपाल महिला सङ्घकी कोषाध्यक्ष ऋतु केसीको सञ्चालनमा अघि बढेको कार्यक्रमको अध्यक्षता तारकेश्वरका ईश्वरी फुँयालले गर्नुभएको थियो ।
